Толькi дзе птушка тая?

Тым вёскам(деревням),якіх ужо няма,прысвячаю

У журботным тумане
Мая мара вітае,
Яна з ночы да рання
Птушку шчасця шукае.

Толькі дзе птушка тая ?
Можа дзе за мяжою
Доўга кружыць,лятае
Над чужою зямлёю ?

Буду шчыра маліцца
Я да Матухны Боскай,
Каб змагла апусціцца
Птушка ў родную вёску.

Хай зачэпіць крыламі,
Бы асілкі,каштаны,
Паляціць над садамі,
Што стаяць счараваны.

Памяць хлусіць не ўмее-
Хай з рачулкі нап'ецца,
Мо тады зразумее
Моцны боль майго сэрца.

Можа ўспомніць,пазнае
Вокны роднае хаты.
Дзе на даху чакае
Яе бусел цыбаты.

Ён яшчэ спадзяецца
На яе,адзінокі,
Што яна застанецца,
Як прылеціць здалёку,

Будуць іх птушаняты
Людзям радасць прыносіць.
Паляціць птах крылаты
Да таго,хто запросіць...

Цішыня ў наваколлі.
Няма ў полі скацінкі.
Тут не бегаць мне болей
Басаногай дзяўчынкай.

Зачакаліся людзі
Гэту птушку ў госці.
Мусіць шчасця не будзе-
Шмат крастоў на пагосце...

У журботным тумане
Мая мара вітае,
Яна з ночы да рання
Птушку шчасця шукае...