Курра согахь хьо хьажача,
Са дог ловза доал.
ГIалгIай йоI, хьо елаелча,
Уйла михьар йоал.
Готтаву со хьа хьажаро,
Сина бала бу;
Сай доалахь хьо цахиларо,
Дега Iаткъар ду.
ХIана я хьо хийра ювлаш,
Селла курал еш?
ЧIоагIа ловра, дагавувлаш,
Хьоца хилар, Iеш.
Са ма дий са арадувлаш,
ГIийла узам беш,
Селла балане со кхувлаш,
Дега Iазап деш.
Маьлха лепа уж зIанараш,
Хьо бахьанна леп.
Iурра дека оалхазараш,
Хьа сийленна дек.
Цар лепарца бIар-са ловзаш,
Хьа юхьга со хьеж.
Цар декарца уйла хьесташ,
Хьо сай хурга теш.
БIаьстан юхье тоха зиза -
Хьа сибат ма дий.
Цу зизан тIа нокхармоза -
Хьа дегI мо, ма бий.
Сона я хьай зизай хозле,
Дега товр а де.
Сона ба хьай меза чами,
Аьла согI хьаве.
Курра согахь хьо хьажача,
Са дегI зувзадоал.
ГIалгIай йоI, хьо елаелча,
Дегах ала боал.
27.03.2015 шу (язъяьр)
12.10.2017 шу (тоаяьр, тIатохар)
ГIалгIай йоI
© Copyright: Аслан Куазо Ингушетия, 2015
Свидетельство о публикации №115032710775
Свидетельство о публикации №115032710775
Рецензии