Дагъиста халкьла поэт Х1ямидхъала Мях1яммадлис

Дигахъис х1ела тугъи
Баракатли диц1ибти,
Кьац1ван нешли берц1ибси
Азир бирк1айс бизити.

Х1ела поэзияла
Урунж саби умуси,
Милигсили шарабван
Нунира хуп1бируси.

Х1угъунти поэтуна
Биц1аллири иш дунъя,
Сирилавсила ах1и,
Х1ергъиб инсанта гьуя.

Идбаглацад пасих1деш
Гьанарар белк1аназиб,
Х1ела у г1ях1лис буру
Дагъиста анкъурбазиб.

Аркьули сари дусми
Къяйбарили къргъиван,
Умули ва зукьили
Х1ялани сар нургъбиван.

Мях1яммад, ц1умх1ейк1ех1е
Дусми аркьули или,
Ц1умдик1еси убях1деш
Ах1енрану барили.

Кален даим г1яшикьли
Умул жагадешличи,
Дигили чархьик1ули
Г1ях1деш бирул инсайчи.

Х1у игъбарла адамри
Багьа, у ахъли дихул,
Г1ях1ял виаб, шан виаб,
Кьац1ли, дигили валхул.

Х1у пагьмукарси виъни,
Ил игъбар халал ах1ен,
Адамдеш ахъли дихни,
Ил гьунар камси ах1ен.

Мях1яммад, чебиулрив,
Далайчиби- "зубарти",
Билшуси чирагълацад
Чузиб шала агарти?!

Чинаба поэтуни,
Урк1бази нур лук1ути?
Гъягъялизиб мургьиван
Дек1арли лямц1бик1ути?!

Нушаб шалаик1ахъес
Ватаби х1у Аллагьли,
Хъумартаб х1ечи гьуни
Бунагьли ва балагьли.

Лук1ен, лук1ен, Мях1яммад,
Аллагьли ахъри габну,
Х1ела тугъачи х1ерти
Даргантазиб бахъалну.

Кьац1ра, шинра, гьавара
Гьар барх1и бизиигаб,
Х1ела анкъиларсила
Дях1бацван шаладик1аб.