Эгер аллагьдиз мани лугьуз кан хьанайт1а

Эгер Аллагьдиз мани лугьуз кан хьанайтIа...
                (прозадин шиир)

-Вот, подруга, я принесла...
Лиляди икI лагьана, зав са затI вугана... Яб акалзава за. Зи кIвализ яваш-яваш чкIизва са илагьи ван...Аллагь, аллагь, им вуч ван я, им гьихьтин сес, иер, хару, михьи икьван?!. Налугьуди, зар къвазва Цавай Чилел, нур авахьзава Цавай Чилел..."Бархатдин экуьнин береяр" я Чилин винел...
Заз акI жезва, лап гьисятда къвазда зи рикI...Лал хьанва зун, чизвач заз рахан зун гьикI?..Яраб им инсан я жал, инсандихъ ихьтин ван жедани?..
АкI я хьи заз и ванциз агъзурралди ава йисар, и ванци и чи Чилел мус ятIа хьайи, чаз чизмачир Иервиликай, Михьивиликай, Хъсанвиликай гузва хабар... АкI я хьи, заз, и ванциз хьиз зазни агъзур-агъзур йисар хьанва, зи хиялар, зи фикирар кьиляй-кьилиз а ванциз ухшар хьанва, михьи, кьакьан, иер хьанва.Налугьуди, вири гьиссер зи, а ванцин нурарив чуьхвена-чуьхвена михьи хьанва, нурлу хьанва, цIийи хьанва...АкI я хьи, заз и дуьнядин вири рангар дигиш хьанва, лугьуз тежер иер хьанва, экуь хьанва са илагьи нур гьатай хьиз...
Эгер Аллагьдиз мани лугьуз кан хьанайтIа, и ванцяй лугьудай, заз чида...
...Манияр куьтягь хьана...Лиляди а шеъ гваз хъфена... Йисар фена...Дуьня гьикьван дигиш хьана, инсанар дигиш хьана, манияр дигиш хьана...Амма а ванциз, илагьи ванциз зи рикIевай ашкъи, зи гьейранвал дигиш хьанач, зи шад юкъузни, зи дар юкъузни ам захъ галаз я...
Эгер Аллагьдиз мани лугьуз ккан хьанайтIа, и ванцяй лугьудай, заз чида. И грекдин ванцяй. Демисан. Демис Руссосан.