Бахтсуз юкIв

Гьаз абдал юкIв ебгурава?
Гьаз мухриъ чIигъ апIурава?
Дердер вари хабарсузди,
Алахьну кIури му уьмри.

Саспиган шулва бицIирси,
Гагь аьлкъюри, гагь ибшури
Хилар завариз заргури,
Кьябаъ дахънайи бицIирси.

Гъахьунза гизаф уьлкйириъ,
Абгус ккунди увуз цIиб бахт,
Хъа сикинвал абхъну мухриъ,
Анжагъ, абгус амдруган вахт.

Лал улар гъягъюра нивкIус.
ДапIну нивкIу ву архаин,
Гъаабхнийиш баладайзуз,
Йиз ккунирин кьамкьариин.

КIулис хурза, гъузган сарди,
Фу гъабхьнуш ва фусан гъябкънуш,
Тахсир вуди, ясан дарди
Шли ухьуз гиран кадапIнуш.

Гьаз туврава кIулиз фикрар?
АпIури дураркан шиърар,
Ургурайиган багърумар,
Пашман, язухъ яв хиялар…

СумчIурпи йисак кубкIиган,
ГьитIибкIус ккунди зиян,
Ккунивалра дапIну пиян,
Даккнирихъди албагунва.

Аман имдруган йиз жандиъ,
Мюгьюббат узухьна гъафну,
Лицуз гьамус кюкдин багъдиъ,
Белки, гьамус зуз кьан гъабхьну.

Ккунивал, якьин, гьар касдиз
Завариан гъюр саб ражну,
Бахтра тувру гьар инсандиз,
ГьадабтIнайиси кьисматну.