Инсан килиг гуьрчегвилиз дуьньядин,
Цавар-дагълар, гьуьлер-чуьллер аламат.
Агъур цифер винел кьесил гьавадин,
Акъвазнава марфадив куз къурамат.
Экъеч1зава цуьк к1еви чил кук1вариз,
Гъвеч1и дувул гьуьлдандилай т1арам я.
Нуьк1рен манид ракъуриз багъ ахвариз,
Гуьзел гатфар адан рик1из илгьам я.
Йифен бере, тик булахдин ширширди,
Секинвилин гъвеч1и са к1ус ат1узва.
А ширширдай бендер хьизва шиирдин,
Булахди жал вичин дерди лугьузва.
Булахдин яд, белки чилин накъвар я,
Гъетер акваз, къужахда кьаз тежезвай.
Цавни чил бес агъзур йисан дустар я,
Арадавай мензил яргъаз тежезвай.
Атирдин ни къвезва гьар са бустандай,
Марвар цуьквер дамахар гваз рахазва.
Гараривай мугьман хьайи Ширвандай,
Хабарикай дуньядавай юзазва.
Суал ава, вуж чилерин пачагь я?
Ни гъанва и гьар аламат арадал?
Жаваб гуда, а пайчагь сад Аллагь я,
Гуьрчег абур гъайи экуь дуьньядал.
Вуж чилерин пачагь я?
© Copyright: Сулейман Ахтынский, 2014
Свидетельство о публикации №114122811686
Свидетельство о публикации №114122811686
Рецензии