Гьуьжетун Шагьмардан - Эйваз

Шагьмардан

Манияр билбилри   лугьуз акур тир,
Аранда   и   кlвалах лагь , низ акур   тир?!
Дагъларин кукlушдин ажеб  абур   тир
Лекьери   лирлияр   лугьуз   хъфизва.

Эйваз
Лекьрен рик1ни  к1анивилиз  муьт1уьгъ  я,
Квез  акурди  са суза  я, са  кьив  я.
Зи лирлияр  рик1яй – рик1из  са муьгъ
Дуьнья тирвал  Дидед   ч1алал  чик1извай.

Шагьмардан
Дегиш   я  замана  лугьуз тежеркьван-
Жагъизмач бубайри эцигнавай   къван,
Къвезамач   хуьрерай “Лезгинкадин”   ван,
Пехъери лекьерал хъуьрез  хъфизва.

Эйваз
Ви  тезенаг  зи симинихъ  галукьна,
Ц1вагъ алахьиз ,ц1ай алахьиз  амукьна,
Чал аямдин  мич1и-мич1ер алукьна
Гила  лекьер  са-садахъ кваз  кик1изва.
 
Шагьмардан:
Мвегъуьн  тар  Муьшкуьрдин абур  кlалуб я!
Гьар са тар сирр хуьзвай  чlехи   улуб я!
Ктlанвай кlанчlарни атlай зи тlуб я!
Чилерин  иервал   цавуз хъфизва.

Эйваз:
Муркад къаяб  яд  ийидай   Рагъ ава.
Агъзур патай кук1варайт1ан    сагъ амай,
Шукур  хьурай чаз  Ч1ал  лугьур,   дагъ  ама.
Т1алари  ваъ , за  зи т1алар  чуькьузва

 Шагьмардан:
Ватанда   йифизни эквер кlанда заз!
Жуванд   хьиз   гьар кlвале  мехъер кlанда заз!
Дидедин   чlалаз пак рекьер   кlанда  заз!
Вучайтlан ,чи кьел чи   хамуз   хъфизва.

Эйваз:
Ви  рик1из  кьий икьван  ч1ехи  къаст авай,
Гьар  са хуьре  заз  к1вал ава , дуст  ава.
Заз  межлисдал  лугьудай са  тост  ава:-
Дидедин  ч1ал т1арат1  кьаз хьуй винизна.

Шагьмардан:
Пешерал   кам   вегьиз там галай патахъ
Фидай зун са юкъуз,  кичlезва анжах,
Къацувал кьуранва, хьанва   лап хъвалах
Жейранар    шегьердин салуз хъфизва.

Эйваз:
Жуваз    т1вар  хьана  зун,алемдиз са  ник,
Шаир   я,  хиялрив сад хъуьредай  рик1.
Эйвазан  т1аларив къугъунивай   ик1
 Чанда  ифин   гьатна ц1аяр куьк1уьзва.