Муьгьуьббатдин шагьидар

  (дустунин суьгьбет)

Агь, уьмуьрдин хуш легьзеяр-дуьшуьшар,
Куьне кьисмет к1ани патахъ тухуда!
Мез, къилихни кваз ийида дегишар,
Гару тухур вун са пеш я луьуда...

Гьик1 ят1ани са сеферда жаван яз,
Экъеч1дайла театрдин рак1арай,
(Зун шегьердиз акъатнавай мугьман яз),
Таниш тушиз, гьатнай чун кьвед "ракьара".

Зи костюмдин хилехъ галай седефдихъ
Хатадай яз ви шалдин ц1ил галк1анай.
Ви регъуь чин-кьил квахьна зи кенефдин...
Къиреда хьиз чун дуьзендал алк1анай.

Вун, чилина гьатай гъед хьиз, вилик кваз,
Зи гаф, зи ч1ал квахьнай завай легьзеда,
Агь, и легьзе!Хуш гъалаба рик1ик кваз,
Гьахьнай вилер ви вилерин дегьнеда...

Сада-садаз "багъишламиш" легьана,
Шал галудиз гьерекатнай гъилери,
Квез я гафар? Чи рик1ер чеб рахана,
Чпин к1валах авунай чи вилери...

Ик1 дуьшуьшди кьисметар сад авуна,
Чун бахтлу я рик1яй-рик1из рехъ аваз,
Сада-садан гуьгьуьлни хун тавуна,
Яшамиш жез къе ч1арарал рех алаз.

Костюмни шал-"муьгьуьббатдин щагьидар"
Ядигарар хуьзва чна саламат.
Эхь, чун туьш хьун Сад Аллагьдин кьадар тир,
Кьисмет гьахъ я, авач ина аламат...

                1997