Савкьватар

Гатун эвел.Паласада некьияр
Яр ацалтна, бубуяр хьиз аквазва.
Цуьквер юкьва, мулдин цуьк хьиз, к1ани яр,
Мани лугьуз вич-вичивди рахазва.

Ара-ара, заз вил ягъиз, айгьамдив
Хъуьрез, вуна некьийрин к1унч1 ат1узва.
Ни гьуьжетрай, де лагь, къе ви гевилдив-
Хуш манийрив дере-тепе ац1узвай?

Гьиссзавач за т1ебиатдин гуьзелвал-
Анжах тек вун, вун я рик1е авайди.
Ракъинал хьиз, ашукь хьанва, гуьзел вал,
На лугьуди, вун я чилел алайди.

Къе вакай за сифте шиир кхьизва,
Гагь ваз, гагь-гагь Шалбуз дагъдиз килигиз,
Шумуд гьиссер къвез зи рик1яй хъфизва,
Куь гуьзелвал кьвед сад-садав гекъигиз.

Мили хъвериз бирдан вилик атана,
Некьийрин к1унч1 гузва на заз гъиляй ви.
На лугьуди, рагъ чилерал аватна-
Агъзур хиял фена кузвай рик1яй зи...

Вуна гайи савкьват недай чкадал,
Ви "некьийрин п1узарар" за незва, руш.
Вун мум хьана ц1разва зи яхада
Бахтлувиляй вилел накъвар къвезва, руш.

Къе нин савкьват багьа ят1а чидач заз,
Килигзава чун чаз бахтлу вилерай.
Гьич вун амаз маса гуьзел гъидач за,
Вун гими я зи ашкъидин гьуьлеллай.

                1969