Бахтуникай

Бахт – газар я куьрсарнавай лашунихъ,
Газар галай лаш ви гъиле яргъи я.
Физва вун каш акакь тийиз кашунихъ
Агакь тийиз бахтунихъ – рикI гъуьргъуь я.

Вун бахтунихъ къекъвемир гьакI гьавая,
Бахтлу жедай ийиз алахъ кIвалахар.
Гьар са тIалдиз герек тир затI – дава я,
Чархай виниз экъечIай хьиз булахар.

Вужар ятIа бахт жагъизвай инсанар?
И суалди мажал гузвай рикIив зи.
Гьар купIунин вилик ягъиз азанар,
КъвезватIа бахт, мукьув жез кIанз рекьив зи?

Са ни ятIан авунал ви тарифар,
Вил эцигна акъвазун ви зиян я.
Гужуналди на вун ийиз зайифар,
Пияла-затI такъвана, вун пиян я.

Ваз бегенмиш ятIа авур кIвалахар,
Гъейри касдин тариф ина гарек туш.
Чархар падиз экъечIзавай булахар,
Чеб паталди, недай, хъвадай хуьрек туш.

Амма вичин яд хъвайила, булахдиз,
Акакьай хьиз я ам вичин бахтунихъ.
Гьахъни батIул чида анжах Аллагьдиз,
Агакьарда гьада чи гьахъ-гьакьунихъ.

Са чIавузни чIугваз тахьуй гьайифар,
Мурадрихъ вун агакьначтIа, кIан хьана.
Са вун туш кьван, кайи кьванбур-арифар,
Халкьдин кьиле къадир течир хан хьана.

Вал чан алаз акуначтIа бахтлувал,
Гележегдин несилриз вун чир жеда.
Акур чIавуз ви крарин гьахълувал,
Ви сурукай зияратдин пIир жеда!

Чан аламаз шадвал ая, кIвалахиз,
Бахт тушни кьван халкь авун вун инсан яз?
Халкьдиз къуллугъ ийиз, гьар къуз алахъиз
АватIа, ам цIуд бахтунлай хъсан я!

Гьа и жуьре сабурар тваз рикIе зи,
Рекье твазва гьам йифер, гьам йикъарни!
КIанзавач заз цуьквер цана рекье зи,
ТуькIвенвачтIан кIани кьадар крарни.

Сажидин, на сабурар це, сабурар -
Са вун бахтлу хьунухьални кар алач.
Халкьдиз чида нел гъидатIа абурар,
А бахт къведай йикъал гьеле тIвар алач!