Жегьилрин гьуьжет

Гагь чан лугьуз вуна гардан кьада зи,
Гагь вуна заз чин ч1урда лап экъисна.
-Вун ч1алахъ хьухь, кьил элкъвезва, т1азва зи,
Ви макьамдал кьуьл текъверди за гьиссна.

Пакам кьиляй демекдавай к1екери
Ван къачурла, рагъ аватна гьаятдиз.
Вил т1ушуниз, тияндавай пекерив,
Къугъвада вун туна зунни баятдиз!

Гаф лагьайла, нарази яз вуна заз, -
Гагь жавабдач, гагь лугьуда «акъваз ман!»
Хабар кьурла дерди-бала, гузвай наз, -
Саймишсуз жаваб гуда «алат ман!»

-Я азизди, сабурлу хьухь, вуч хьана, -
Заз жаваб це, т1армир зи рик1, - лагьайла,
Заз жаваб яз, - мад вуч жеда, -гуж хьана, -
Заз хуьр к1андач, к1валах к1андач на гай гьа!

Ийир-тийир хьайи зи гьал хабарсуз,
Теспача яз девранривай къакъатна.
Мад вучдай кьван, - хъвана ички кьадарсуз,
Ахпа зи дерт яваш хьана алатна.

Яргъа амаз зун акуна зи ярдиз,
Гьал кефина аваз хтай куьчедай.
Зун лагьайт1а, симер ат1ай са тар хьиз,
Тамашзавай и дуьньядиз шуьшедай.

Пагь, юлдашар, ягъалмиш зун хьана кьван,
Ички хъвана месэладиз гайи худ!
«Зур» лугьудай т1вар шуьшедиз ганат1ан(и),
А шуьшеди зурзурда лап к1валин  кьут!

Гьуьрмет, сабур къакъатзавай к1валивай,
Вахтунда хуп1 хабар хьана жегьилриз.
Хизандин бахт гьарда михьи рик1ивай
Хвена к1анда разивал гуз гуьгьуьлриз!

Гьич садрани гьуьжет мийир, жегьилар,
Гьуьжет – къал я, квахьда к1валин берекат!
Инсан патал буьруьнж, гимиш, къизилар
-Гьич зат1ни туш! Бахтуниз це гьерекат!!!