Чи лезгийрихъ гуьзел рушар,
Пара ава таза яшар.
Амма садни а ваз ухшар,
Акунач заз кас, Латифа!
Я бахтавар СтIал макан,
ТIавус къушар авай мукан.
Хуш тир сифет авай икьван,
Акунач заз кас, Латифа!
РацIам мукал, пIузар кишмиш,
Вун гьи таран ятIа емиш?
Чин некIедин тавур суьзмиш,
Акунач заз кас, Латифа!
Акун гьейран, камал дерин,
Чинал къугъваз милиз хъуьруьн,
Лали гевгьер СтIал хуьруьн,
Акунач заз кас, Латифа!
Эй Сад Аллагь, азиз эллер!
Руьгьдин къашар – чIулав вилер;
Хъуькъвен кьилер къизилгуьллер,
Акунач заз кас, Латифа!
Сажидиназ и кьадар хуш,
Я Аллагьди гайидан руш!
Ам вун хьтин Куьредин къуш,
Акунач заз кас, Латифа!
Латифа
© Copyright: Сажидин Саидгасанов 6, 2014
Свидетельство о публикации №114101604402
Свидетельство о публикации №114101604402
Рецензии