"МАРВАР БУЛАХ"
Авахьзава цин чкадал ялав, нур,
Зулун пешер шадвилелди юзазва
Чан хтана бахтавар я Алам-сур,
Марварда къе шиир, мани чразва!
Килиг садра цавай физвай лиферни
Са геренда чаз килигиз элкъвезва,
Чк1ана къе марфар галай циферни
Чи кьакьанра "Марвар"дин нур къекъвезва!
Цуьк хъувуна багъда авай тарари,
Нуьк1 рахазва цуькверивди ч1ал чирна.
Сефилвилив кьил агъузна гарари,
Марвардин ц1у ракъинин нур ифирна!
Къенивилин рекьериз за Марвардин
Цин ст1алар хтар-хтар алахда,
А рекьерай атир галай шагьвардин,
Хайи чилиз шиир, мани алахьда!
Кьуьзуь хьайлан рик1е канда жегьилвал,
Туьхъуьн тахьуй алпандин ц1ай к1валера!
Куь гуьгьуьлдиз мугьман хьайла сефилвал
Марвар"дин экв гьаким хьурай рик1ера!
Марвар булах
© Copyright: Шахмардан Арран, 2014
Свидетельство о публикации №114101410522
Свидетельство о публикации №114101410522
Рецензии