Гьикьван ширин, масан я вун,
Вирт1едилай хъсан я вун.
Гьар са йикъан дамах я вун,
Чан зи хайи Диде Ватан!
Чара пата яшар физва,
Вун такваз лап, йисар физва.
Жегьил вилин камар физва,
Чан зи хайи Диде Ватан!
Фикирдай кьван, кьил рехи жез,
Такварла вун рик1 сефил жез.
Вил акьур кьван, хер хъати жез,
Чан зи хайи Диде Ватан!
Къацу багълар атирлу тир,
Чуьллер, дагълар бегьерлу тир.
Эхъведайла, зун гужлу тир,
Чан зи хайи Диде Ватан!
Рик1е гзаф дердер амаз,
Хайи Ватан рик1е амаз.
Рекье гьатна чара патаз,
Чан зи хайи Диде Ватан!
Гьакьван вун заз ширин я чан,
Женнетдилай гуьрчек я чан.
Вун зи рик1ин дарман я чан,
чан зи хайи Диде Ватан!
Диде ватан
© Copyright: Назиль Махмуд 76, 2014
Свидетельство о публикации №114101100476
Свидетельство о публикации №114101100476
Рецензии