Рагьметлу Ибрагьим Гьуьсейноваз

Къе, 2014-йисан 2- октябрдиз, чал рикIер тIардай хабар агакьна. Дагъустандин литературада ва медениятда дерин гелер тур бажарагълу шаир, машгьур драматург, литературовед, хъсан исан, еке тир арифдаррин тухумдин векил Ибрагьим Абдулкеримович Гьуьсейнов чи арадай уьмуьрлух яз акъатна. Адан яратмишунар ва экуь къамат лезги халкь амай кьван рикIерай акъатдач. Чна адан хизандиз, амле-миресриз, дериндай хажалат чIугунив башсагълугъ лугьузва.

За куьн фикирдиз, адан сурал кIелай шиир гъизва:

Им дуьнья я, къвез, хъфизвай мугьмандиз,
Къуллугъ ийиз ганвай халкьдиз, Ватандиз.
Къе вирида тикрарзава пашмандиз:
Ваз рагьмет хьуй чIехи шаир Ибрагьим!

РикIин кIусар багъиш туна халкьариз,
Хайи хуьруьн хтанва вун накьвариз.
Женнет багъиз физвай ширин ахвариз,
Ваз рагьмет хьуй чIехи шаир Ибрагьим!

Халкьдин рикIе, эбеди яз саламат,
Амукьда ви ишигълу тир пак къамат
Женг чIугур кас гьар са карда керамат,
Ваз рагьмет хьуй чIехи шаир Ибрагьим!

Къугьдин туьк хьуй накьвадикай хъуьтуьл тир,
Халкьдиз багъиш авур уьмуьр – къизил тир.
Сажидина лугьузва ваз, сефил тир;
Ваз рагьмет хьуй чIехи шаир Ибрагьим!