С. Есенин. Пускай ты выпита другим

Вун чарадаз хьанатIани,
Амукьна заз вакай лугьун,
Шуьшед гум  ранг чIарарин ви,
Гьамни зулун  вил галатун.

Агь, зулун чIав! Ам заз пара
Гатарилай  жеда хьи  нуш.
Вун лап кьве къат  и йикъара               
Шаирдизни хьана хьи  хуш.

РикIин къеняй за гьич  табдач,
Гьавиляйни  лавгъавилиз
 Лугьуда  гаф, гьич татабдач,
Шулугъвилер  хкадариз.

ЧIав я гила, чара жен икI, 
Игитвилихъ галаз хару.
 Бузадивди  ацIанва рикI,
Ийизва  зи иви кару.

Ва  гатазва гьа зи дакIар
Мара вацран  цIвелин тарци,
Ахъайдайвал адаз ракар,
Къведайвал ам тушиз акси.

Гила фад-фад жезва  рази
Квачиз зиян, я мажбурар.
Маса жуьре –Урусат  зи,
 Маса жуьре  - к1валер, сурар.

Килигзава за кьуд патахъ,
Аквазва  гьа,  ина, ана
Тек са вун я гьам  дуст, гьам  вах,
Вакай жедай зазни  даях.

Завай тек  ваз  лугьуз жедай,
Садикьвални   аваз  кьиле,   
Мани  рекьин  мичIерикай,
Квахьна  физвай шулугъвиле.