Гьала гIебшнила дирихь
чебашес бехIбихьалли,
вацIализир галгуби
зурхIябтиван ухалли,
ванзаличи кIарали
кьалтинти удушалли,
юглизидяхI арцанти
хIункьрадли ардашалли-
илхIели нура аркьяс
гIелабси архIяличи,
аркьяс ахиратлизи
дила хала бегIтачи.
Аркьяс, амма рухI кавлан
гьавала лехIдешлизир
кавлан умути шинна
ругерла агилизир.
Рахли мерс далкьутиван
къукъу-рямхъ кIухдухъалли,
гъагултала цIябдешли
дунъя ясирбуцалли,
Гьарахълабад лябкьуси
берхIила нур аурли,
хIушачи нура ляркьяс
дунъя шалабирули.
Ляркьяс гIялам берцахъес
кахти гIязабтазибад,
цIябдешли дицIиб уркIби
дирцIахъули умутли.
***
© Copyright: Патимат Будаевна, 2014
Свидетельство о публикации №114090701818
Свидетельство о публикации №114090701818
Рецензии