гъезелар

ГЪЕЗЕЛАР
Яр, цуькверал рикI алай зи, бахш авунач цуьквер вуна,
Катна вучиз тухуьрна икI  зи уьмуьрдин эквер вуна?
Тахсир квачиз ялзава за гуьгьуьлдаваз зулумдин пар,
Авунва зун яраб вучиз ашкъидин лукI-нуькер вуна?

Муьгьуьбатдиз къилав гана, чуьнуьх хьана кичIерди хьиз,
ЧукIурзава, лагь, яр, вучиз, зун элячIдай муькъвер вуна?

Сифте завай гаф къачуна, алцурна гьакI ширинна мез,
Гила вучиз цазва цацар, кIевзава зи рекьер вуна?

И Сейлидин рикIиз азаб даим на гуз, вучна за ваз,
Акурла зун пелер чIуриз, къимишзавач са хъвер вуна?
                04.12.2013

**********************************************

УЬМУЬР

Къадир хьуй ваз гьар са йикъан, акI жемир хьи, пар я уьмуьр,
Каинатдин вахтуникай ваз атIанвай кIар я уьмуьр.

Дуьшуьшдин кар туш гьар инсан къвезва винел и дуьнядин,
Аллагьди ваз гьакI са герен бахш авунвай вар я уьмуьр.

РикIе авай мурадар ви са-сад кьилиз акъуд вуна,
Амукьайдак шехьни мийир, бес жедай туш, дар я уьмуьр.

Эй Сейли, вун ашукь хьана и дуьнядин гьар са чинал,
Даим лугьуз: цавари вав кхьиз тазвай цIар я уьмуьр.
                20.02.2014.
*******************************************
"МАРВАРДИН" СА ЙИС
Шумуд йис тир лезги мани , шииратда давар хьана,
И кар акваз шаир Эйваз къвекъвез авай ахвар хана.

Са йис вилик кIватIна ада рикI алайбур шиирдал чи,
Къизилгуьлдин тIвар алай чаз, цIийи кIватIал "Марвар" хьана.

Кан я хьи чаз дидед чIалан мани-шиир лувар галаз,
Цава нур гуз Яргъирушан ирид рангад шарфар хьана.

РикIин гафар тахьуй амукь, кхьин герек къелем кьуна,
Хайи чIалал шиир къурай инжияр хьиз марфар хьана.

ЦIийи кIурукI-цуьрцер акваз хвеши я къе Сейлидизни,
Кан я адаз чи "Марвардиз" яргъи уьмуьр-чIавар хьана!
                25.02.2014