Ялтахан эхир

«Лагьай чIавуз кицIиз - аслан!
Иесидай кьуна вичин.
Гъавурда фад гьатна чIалан,
Куьмекар гуз хьана кIвачин.

Квез герек я амай яракь?
КицIикай заз даях хьана.
Регьят рекьер ийиз суракь,
КицI гьамиша уях хьана.

Угъридиз за лагьана - пIир!
Къуччиди са гьер гана заз.
Иблисвилин чир ийиз сир,
Терсина яз звер гана заз.

Дуланажагъ - гьар къуз артух,
К1вале лугьун-хъуьруьн хьана.
Ресторанра тIуьнар гуз тух,
«Дустариз» зун ширин хьана.

Фитнечи за авурла - гьахъ,
Багъишна заз кIвалерни кваз!
Гьар акурла, атIуз зи рехъ,
Маса гана эллерни кваз.

Шегьерда - кIвал, дача - хуьре!
Ярар-дустар бул хьана заз!
Девлет кIватIиз гьар са жуьре,
Куьтягь тежер пул хьана заз!

Дасмалчидин хвейила пад,
Закай михьи къизил хьана!
Еке кас яз акъатна ад,
Хкаж хъижез кьезил хьана!

Завди мукьва ийиз ара,
Къавум-къардаш артух хьана!
Кьве бегьер гъиз гьар са тара,
ЦIийи рекьер ачух хьана!

Эхир кьиляй вакIаз - буба,
Лугьун патал кьин гана заз!
Ам - айиб яз кьурла зурба,
Вирибуру кьуьл гана заз!

Ярар-дустар, кицIни галаз,
Катна, закай яргъа хьана!
Угъри фена, къуьр хьиз валаз,
Фитнечидкай - къаргъа хьана!

Къавумри зи тарашна кIвал,
Дасмалчидихъ уртах хьана.
Бармакдикай - куьгьне кукIвал,
Полтодикай - хъалтах хьана!

Эхир кьиляй хьана ажуз,
Лугьузва за: «Вуч хьана заз!»
Акьул жедач маса къачуз,
Эхиз тежер гуж хьана заз!

СтIалдаллай Сажидиназ,
И кардикай мах хьана хьи!
Дугъриданни а касди заз,
Лагьай гафар гьахъ хьана хьи!