Америкадай къведа чаз халу

Гьуьрметлувилин квахьайла девлет,
Душманар жеда: стха, вах, миллет.
Къе чун гьатнавай акурла зиллет,
«Къутармишиз» кIанз - буба хьиз уллу,
Америкадай къведа чаз «халу»!

Къудратлу уьлкве авуна паяр,
Сас экъисна чал хъуьрезва таяр.
Хкахь тийизмай кутуна цIаяр,
Ахмакь халкьариз таре гуз «акьуллу»,
Америкадай къведа чаз «халу»!

Тарашна къизил - хазина еке!
Алат тийидай хьана чал леке.
Виридаз виляй аватна уьлкве,
Гуьнгуьна хутаз «хендеда шулу»,
Америкадай къведЗ чаз «халу»!

НафтIар кьулухъди хъфека чилиз.
Шекеррин дагълар цIуьдгъуьрна гьуьлуьз,
Экв хикин хъийиз «буьркьуьдан» вилиз,
Садан кьил гатаз, муькуьдан - далу,
Америкадай къведа чаз «халу»!

Гафариз - фараш, хийирдиз - кьери,
Регьберар жезва хьайибур вири,
Багьа хьанва фу, жагъизмач гъери,
Руфунар хъийиз са вадан дулу,
Америкадай къведа чаз «халу»!

Эхир кьил - эхир пуч хьана хьи чи!
Гьар цIудан кьамал акьахна къучи!
Гишила вилер хьайила мичIи,
Экв куькIуьр хъийиз, лампа гваз уллугъ,
Америкадай къведа чаз «халу»!

Регьверикай чи ракъур хъийиз кьил,
Шумуда яргъи ийизва чал «гъил»!
Са хендедадиз цIувад хьанва гъуьл.
Чи багъдиз гуьзел ягъиз кIанз цулу,
Америкадай къведа чаз «халу»!

Вуч паталди тир зегьметар чIугур?
Им са экв тир хьи вилериз акур!
Хци яракьар авуна какур,
Элкъвей чи кьилер ийиз кIанз «кьулу»,
Америкадай къведа чаз «халу»!

Ажеб хъуьредай крар хьаначни:
Эй, Сажидин, ви сарар ханачни?
 И чIал кхьей ваз зарар хьаначни?
Ви дуванни кваз ийидай къанлу,
Америкадай къведа чаз «халу»!
Америкадай къведа чаз «халу»! I990-йисуз туькIуьрай шиир