Бендер

Самур вацIу кьве пайнатIа миллет зи,
Чи кьисмет ам сад хъийидай къуват хьуй!
КцIарви руш, на хуьзватIа гьуьрмет зи,
Къуй чи рикIер уьмуьрлухди агат хьуй.

               
РикI сефил я, нагъв ала зи вилерал,
Гьижрандин серт гьиссери зун кузва, дуст.
Дава тагуз, хирер хъийиз хирерал,
Агь, кьисметди заз азабар гузва, дуст.

               
Чи кьисметдиз буба акси хьайитIа,
Мегьамедан хуравай рикI цIрада.
Свасвиле заз гъейри са кас гъайитIа,
Вун галачир дуьньяда зун кьурада.

               
Зи бахтунин гъед мидаим туьхвена.
Уьмуьрдин рагъ акатнава булутрик.
Мад хъуьредач ви вилер захъ элкъвена…
Чан гузва къе эхиримжи умудди.

               
Дердер эхиз акъатзава жегьилвал,
Яраб мад вуч къалурдатIа кьисметди…
- Гележегдин савкьатни я сефилвал, -
И «муштулух» гузва рикIин суьгьбетди.
               

Агь, зи илгьам, куьз ранг алаз йиферин,
Гьар сеферда вун къвезава патав зи?
- Зак тахсир квач, эй иеси дердерин,
Гьис ала зал ви кьисметдин ялавдин.
               
 
Ашкъид миже хъвайи за ви хуралай,
ГьикI элкъвена садлагьана агъудиз.
Гадарна зун муьгьуьббатдин кьвалалай.
- КIанзавай тир вун кукIушриз акъудиз.
               

Гьар инсандихъ ктаб ава кьисметдин,
Чи уьмуьрдин гьар са легьзе кхьенвай.
Зи ктабда чарар ава зиллетдин,
Муьгьуьббатни даим текдиз ишезвай.
               

Къакъатайла чи рекьер зи, азизди,
Зайиф хьана гьиссзава за ажузвал.
Килигзава зун Алемдиз дарихдиз,
Юлдаш хьанва заз уьмуьрда ялгъузвал.
               

Кьил эцигна зи кьисметдин метIерал,
Муьгьуьббатди чан гузва хьи, за вучда?
Бегьер тахьай гьич садрани хилерал,
Зи ашкъидин тан кузва хьи, за вучда?
               

Къай-тIурфанди пайда хьайи кьисметда,
Эй зи илгьам, кIусни инсаф тавуна.
Зи уьмуьрдай хабарсуз са легьзеда,
Акъудна вун, вичин хурук кутуна.               

               
Заз уьмуьрда вакай са экв акунач,
Сарсахвили алудна вун рекьелай.
Куьз, лагь вуна, зи рикIе тIвек авуна,
Элкъвена вун зи кьисметдин муькъвелай.
               

Гагь-гагь, ширин, вун заз ахкур дуьшуьшра,
На заз гайи дердери мад незва зун.
Ви тазавал, дадмишай за гуьруьшрал,
РикIел хквез, агь, йифериз шезва зун.
               

Ашкара я зи муьгьуьббат эллериз,
Гуя акI я, вун Эсли, зун Керем я.
Зун уламра гьатнава ваз эвериз,
Ви муьгьуьббат зи хирериз мелгьем я.


Ажайиб я, анжах цавни шехьзавай,
Хабар хьайла зи рикIевай тIалдикай.
Гьайиф чIугваз цIигел яз вахъ тек амай,
Хабар ятIа, яраб ваз зи гьалдикай?


Зун къекъвезва, хиялрик кваз къекъвезва,
Зи азизди, вун фейи кьван рекьерай.
Зи гележег заз килигиз ишезва,
А рекьерал на тунвай пак гелерай.


Зун уьмуьрда зи мураддив агакьнач,
Залай ваз, яр, бахт багъишиз алакьнач.
Са бенде хьиз кьилел дуьшуьш атанвай,
Зи рикI, зи чан хажалатдив ацIанва.


Шадвиликай магьрум хьана ялгъуздиз,
Сирнавзава за гъамарин булутра.
Амукьдалди дуьньядал икI бахтсуздиз,
Къуй кьисметди зун ажалдив агудрай.


Зи муьгьуьббат кIвал я ишигъ авачир,
Тек са вавай ацIур жедай нурарив.
Сир тахьуй ваз: уьмуьрда вун галачир,
Зун кьежирда терс кьисметдин накъвари.


Вун амаз зун кьейитIа, руш, пашман жемир вун,
Зун рикIел къвез зи пак сурал мугьман жемир вун.
Ваз акI жемир вун атайтIа, руьгьдиз хъел къведа,
Текдиз амай вун акурла, адаз шел къведа.


За лугьудач вун виридлай иер я,
А гаф къуй ваз ви кIанида лугьурай!
Захъ авайбур гъам, хажалат, дердер я,
Ваз кьванни, руш, экуь бахтар акурай.