Мемориальный доска

   Алай йис Дагъустандин халкьдин шаир СтIал Сулейман дидедиз хьайидалай инихъ 145 йис къейдзавайди неинки са чи республикада, гьакI Россиядин Федерациядин вири шегьерра, районрани кваз вини дережада аваз шаирдин уьмуьрдикай ва адан яратмишунрикай шадвилин мярекатар кьиле физвай. И мукьвара Сулейман-Стальский муниципальный райондиз са шумуд чкадай чIехи шаирдин мярекатра иштирак авун патал делегацияр рекье тунин теклифар атанай. Кьилди къачуртIа, Краснодардин крайдин Новороссийкий – игит шегьердай ихьтин чар атана:
   "В нынешнем году 18 мая исполняется 145 лет со дня рождения поэта", — сообщили в мэрии. В рамках празднования юбилея в городе – герое Новороссийске пройдет торжественное мероприятие и будет установлена мемориальная доска. Просим Вас участвовать на нашем мероприятии и послать делегацию. 
Къейдна кIанда хьи, РФ-дин чIехи шегьерра чи дагъустанвийри гьакъисагъвилелди зегьмет чIугваза ва абуру чеб хайи ерийривай яргъара аватIани, ватандихъ галаз гьар йикъан алакъаяр хуьзвайди сир туш. Адалайни къецелай, абуру чеб авай шегьерра дагъустандин вам аса вири миллетрихъ галаз стхавилин алакъаяр хуьн патал махсус тешкилатар кардик кутунва. ИкI месела, Новороссийск шегьерда ва адан районра яшамиш жезвай дагъустандин вири миллетрин тешкилат кардик кваз гзаф йисар я. Артухлама, и тешкилатдин кьил чи ватанэгьли, вичин бине Векьелрилай тир, хизанар Кьасумхуьрел яшамиш жезвай Ярахмедов Ярахмед Алаудинович я. Гьадан кьил кутуналди, Краснодар крайда администрациядин кьилин Полномочный Представитель, Государственный I – классдин советник, Государстводин къуллугъдин лайихлу работник Ибрагимов Руслан Алиевича ва адан садлагьай заместитель Газаралиев Адил Фазиловича, чи республикадин гьукуматдин руководстводихъ ва Сулейман-Стальский муниципальный райондин кьил Абдулмуталибов Нариман Шамсудиновахъ алакъаяр хвена, Новороссийски – игит шегьерда 1938-йисалай Дагъустандин халкьдин шаирдин тIвар алай шегьердин кьилинбурукай сад тир гуьзел куьчеда махсус мемориальный доска эцигуниз талукьарнвай шад мяректдиз райондай ва шаирдин ватандай делегация ракъурун тIалабнавай.
   И шад межлисдиз делегация рекье гьатдалди, чи ватанэгьлийриз, СтIал Сулейманан музейдин диретор Лидия Стальскийди Новороссийский – игит шегьерда авай ватанэгьлийриз чIехи шаирдин ктабар, райондай, Дагъусустандин халкьдим чIехи шаирдин суьрет, гзаф кьадар савкьватар вилик амаз рекье тунвай. Аниз физвай делегациядин членар тир, шаирдин ватанэгьли, СтIал Сулейманан мергьеметлувилин фондунин председатель, РФ-дин писателрин союдин член, ДР-дин культурадин лайихлу къуллугъчи, жегьилрин лайихлу наставник, шаир Сажидин, Лезги газетдин хусуси корреспондент, РФ-дин писательрин союздин член, ДР-дин культурадин лайихлу къуллугъчи, шаир Шагьабудин Шабатов, чпин авторвилин гзаф кьадар ктабар ва савкьватар гваз рекье гьатна.
Лугьун лазим я хьи, Новороссийский – игит шегердиз, чахъ галаз, вичел чIехи шаирди тIвар алай Гьукуматдин лезги музыкально-драматический театрдин директор ДР-дин культурадин лайихлу къуллугъчи Мусаев Алибег, Дербент округдин кьил Яралиев Имам Музамудиновичан тебрикдин чар, къадим шегьердин 2000 йисаз талукьарнавай сувенирар, театридин фондунай видеодискаяр, вымпелар гваз рекье гьатна.
   Чи делегация шегьерда Новороссийскийда яшамиш жезвай ватанэгьлийри хушвилелди кьабулна, пакадин юкъуз чун СтIал Сулейманан куьчеда шад мярекат башламишзавай майдндал гъилера чан алай цуьквер аваз шегьерэгьлийри цуьквер гваз къаршиламишна. Кьве патани кьакьан къацу тарар авай и гьяркьуь куьче инсанрив ацIанвай. Иниз шадвал ийиз чи дагъстанвийрихъ галаз санал са стхаяр хьиз яшамиш жезвай кавказдин, украинадин, азербайджандин, краснодар крайдин казакрин, урусрин, вирибурун тIварар дакьуртIани, грекрин миллетрин векиларни кваз авай.
   Лугьун лазим я хьи, СтIал Сулейманан куьче тирди тестикьардзавай мемориальный доска, шегьедин агьали вич грек миллет, Гос. Думадин депутат Георгий Ильич Канакидин дараматдин цлал янавай. Халкьар кIватI хьайила, Новороссийский шегьердин Центральный Округдин кьил, вичи са вахтара Дагъустанди десантник яз къуллугъ авур, Александр Иванович Павлова шад мярекат башламишна. Анал Попова вичин рахунра, Дагъустандин халкьдин шаир, ХХ асирдин Гомеран яратмишунрин къадирлувиликай, халкьарин арада дуствал хуьнин карда авай къиметлувиликай гегьенш суьгьбет авуна. Адалай гуьгъуьниз рахай юлдаш Р. А. Ибрагимова СтIал Сулейман вири девиррин шаир тирди ва адан яратмишунар гьар са девирда гьа къенинбур хьиз кьабулзавайди лагьана.
Гаф, шаирдин хуьруьнви шаир Сажидиназ гана. Ада Новороссийск шегьердин агьалийриз ва ана кIвалахзавай дагъустанвийриз хайи ватанэгьлийрин патай чими саламар рекье тунвайди лагьана, Сулейман-Стальский муниципальный район, райондин кьил Абдулмуталибов Нариман Шамсудиновичан патай Приветственный письмо кIелна. Нубатдин гаф гайи, Лезги газетдин хусуси корреспондент, шаир Шабатов Шагьабудина, чIехи шаирдин, властдин вини дережайриз акъудай Сулеймана вичин лежбервилин партал дегиш тавурвиликай, намуслувиликай дерин метлеб авай келимаяр рахана. Адалай гуьгъуьниз рахай Лезгийрин Гьукуматдин муз-драм театрдин директор Мусаев Алибеге Имам Музамудинович Яралиеван патай саламар гайидалай гуьгъуьниз, Дербентдин 2000 йис къейдзавай суварик виридаз буюр авуна. Анал шегьердин культурадин управленидин, музейдин работникри акьван хъсан гафар лагьана хьива эхирдай морской училищедин рушари шаир СтIал Сулейманан ширар урус чIалал лап устадвилелди кIелайла. кIватI хьанвайбуру секинвилелди яб акалзавай. Эхирдай и шегьедин дагъустанвийрин деаспрдин тешкилатдин кьил Ярагьмедов Ярагьмеда, чпин тешкилатдин членрин гьакъисагъ зегьметдикай, чпи къазанмишнавай гьуьрметдикай ялавлу гафар лагьана.
Яргъалди чIугур торжественный пай акьалтIарна. Дагъвийрин кьуьлерин музыкадин ван кьуд патаз чкIана, майдандиз кьуьлер ийиз жегьилар экъечIна. Чи гадайри ва рушари ийизвай кьуьлери вири гьейранарна. Майдандин муькуь пата цIилинин пагьливанди кьил элкъуьрдай хьтин са шумуд нумраяр къалурна. Мад кьуьлер башламиш хъхьана. Кьарай кьаз тахьай чунни вирибурухъ галаз кьуьлер ийиз, шаддиз тухуз эгечIна. Саки кьуд сятинилай артух авур шадвилер, мемориальный доскадин патав, кьилдин кIеретIрин шикилар ягъиз, гваз атай пишкешар, сувенирар, ктабар ва газетар багъишиз, адресар къачуз акъатна. Са гафуналди, и сефердани, СтIал Сулейман буба себебда чаз цIийи танишар хьана, рикIелай алат тийидай шадвилер хьана. Гьа и юкъуз, майдин 19 даз шаирдин ватанда жезвай еке мярекатдик иштирак авунин мурад аваз, ватанэгьлийриз, шегьеэгьлийриз гъилер яна,Сагърай лагьана, чун ватандихъ хуьквез рекье гьатна. Сагърай вири, виридахъ галаз, Сулейман бубадин куьчедин эгьлияр ва вири шегьер эгьлияр, гьана зегьмет чIугвазвай чи ватанэгьлияр.
Агъадихъ за гьанал кIелай «Риваятрин риваят я Сулейман» ва анай хуькведай рекье туькIуьрай «Куьче ава Сулеймана тIвар алай» ширар ва гьана ягъай са шумуд шикил куьн фикирдиз гъизва.
Сажидин, шаир, ДР-культурадин лайихлу къуллугъчи.
Шабатов Шагьабудин, шаир, ДР-дин культурадин къуллугъчи.

Сажидин
РИВАЯТРИН РИВАЯТ Я СУЛЕЙМАН
Фагьумайла, вил экъуьрна виринрай,
Хайи Ватан и кьадарда ширинрай,
Шаир, акъат авур халкьдин деринрай,
Риваятрин риваят я Сулейман!

Дидедин нек дадмиш ийиз гун тавур,
Хайи бубад кIваликай муг хьун тавур,
Заманади, кесиб яз чин гун тавур,
Риваятрин риваят я Сулейман!

Эхир кьиляй Совет власть суракь яз,
Муьрхъведикай михьи авур яракь яз,
Гьулдан хьтин лигим хьайи, яз ракь яз,
Риваятрин риваят я Сулейман!

Магьрум ятIан кIел-кхьинкай, камалдин
Дагъ хьайи кас, зигьин дерин амалдин,
Фяле-лежбер – сад тир кIута, мукалдин,
Риваятрин риваят я Сулейман!

Къад виш йисан Гомер лугьуз загьир тир,
Шииратдин жавагьирар магьир тир,
Гьар са цIийи девирдиз хас шаир тир,
Риваятрин риваят я Сулейман!

Бахтлу хьунухь патал вири инсанар,
Зегьмет чIугур, чи гьал ийиз хъсанар,
Эллерикай кьунвай вичиз хизанар,
Риваятрин риваят я Сулейман!