Эхиримжи тIалабун

     (баллада)
Сафуниз ухшар авуна беден,
Хтанва къунши женгерай къати.
Гьар хирел адан медални орден
Алаз кIевнавай хурудин кьвати.

Хирерик залан, ажалдик туькьуьл,
МуьтIуьгъ тахьанвай гьунарлу аскер;
Ачух ийиз кIанз дидедин гуьгьуьл,
Мецикай хци ийизвай шекер.

Гьал хъсан акур азиз тир хцин,
Мехъеркай диде эгечIна рахаз.
Чизвачир адаз ажалди къецин.
Тухудайди хва вичивай яргъаз.

Бирдан кефсуз хва, рикIик кваз гъалаб,
Вичив яракьар ва юргъа балкIан
Гун патал авур вахтунда тIалаб;
Дидедиз – кичIе ва хьана - такIан.

Хкаж хьана хва, миселай вичин,
Шуьшка гъилевай аскердин саягъ.
Душмандал вегьез хьайид хьиз кIвачин,
«Виликди, дустар!» - авуна гьарай.

Пайдах хьиз яру къекъифай рангар
Ягъай адан чин -  дере хьана ал.
Хурун кьефесда къати хьана гар,
Гьулдандин рикIи худда туна къал.

КIвалин са пата – мехъерин затIар:
Пекдин лацу шал, шатландка парча.
Мехъерин йикъал алачиртIан тIвар,
Гуьзлемишзавай це лагьай суса.

Гуя ам авай аскеррин юкьва,
БалкIандал алаз, душмандив кикIиз.
Четин декьикьа хьанва лап мукьва,
Хура бес чка жагъизвач рикIиз.

Терг хьурай дяве, пеле авай къан,
Чи къагьриман хва ийизвай чара!
Гьелелиг адал аламазмай чан,
Тунвачир ада кьил гьеле хура.

Эхиримжи яз авур тIалабун,
Яракь тир вичин, балкIан тир юргъа.
Игитар кьиникь дуьз ян гьисабун?
Ажалди вахтсуз къакъудай лавгъа!

КIвале - йикь-шуван, гьаятда - дуьа,
Мехъерин межлис элкъвена йикьез!
Чахъ гьич садахъни авачир мидяй,
Чаз кIанзавай тир ислягь яз къекъвез.

Тегр хьурай дяве, кьиникьин сегьне,
Дуьнья чIур ийиз авунвай алахъ.
Дяве кIанибур са фуруз дегьне,
Вегьез хьанайтIа, тир хъсан кIвалах!
                ---------------------

Къуй, чилел – мехъер межлис хьуй ахъа!
Къуй, чинал шад хъвер, бул хьурай мани!
Шад ийиз рикIер чи гьар са йикъа,
Кьисметар сад хьуй гьар садан кIани!