Диде

Виридалай масанди – сад я вун, диде
Гьуьрметлу юлдашар, гьуьрметлу дишегьрияр! Виридуьньядин дишегьлийрин сувар гьар йисуз ихьтин шад гьалара къаршиламизшава. Им гьелбетда, чи руководителри, вири эркекри, дишегьлияр тир дидейриз, уьмуьрдин юлдашриз, вахариз ва чи рушариз ийизвай еке гьуьрмет я. Абуруз виридаз чухсагъул. Зун дагъви хизанда чIехи хьана, ингье жуван уьмуьрдиз вил вегьейла, советрин гьукуматдин девирда чирвал ва тербия къачурбурукай сад я. За, эвел гъвечIи ва ахпа са кьадар чIехи ва жавабдар къуллугъар авуна. Заз, чи дидейри Ватандин ЧIехи дяведин йисара гьикI зегьмет чIугунайтIа акуна. Вири эркекар душмандихъ галаз дяведа авайла, чи Зарбаф бах хьтин кьегьел дишегьлийри, фронтдиз недай-хъвадайдал куьмекар гана. Дишегьлийри окопар эгъуьниз трудовойда кIвалахна. Дяведилай гуьгъуьнизни чи баркаллу дишегьлийри, чкIай колхозар кIвачел акьалдариз куьмекар гана.
Гьуьрметлу юлдашар, дишегьлийрин кьилин буржи дидевал авун, аялри дуьз тербия гун ятIани, абуру эркекрихъ галаз къуьн-къуьне аваз, гьар сада вич авай чкада намуслувиделди зегьмет чIугуна ва и кIвалах давамни хъийизва. Руководителар яз къуллугъар авур чи чIехи вахар: Саният Джабраиловади, ФатIимат Джамалдиновади, Саимат Альдеровади, алай вахтунда лайихлу ял язавайбурукай тир Маина Абдулмуталибовади,  Мислимат Агьмедпашаевади, цIудралди масабуру производствода, духтурханайра, школайра, колхозрин чуьллера зегьметар чIугуна ва амайбуруз чпелай хъсан чешне къалурна. Гьукуматдини абурун зегьметдиз еке къиметарни ганай.
Зун алай девирдин дишегьлийрикай рахайтIа, абуру чпин дидевилин буржияр хъсандаказ кьиле тухузва. Дидейри, вахари, рушари, гьатта школада кIелзавай аялар тир рушарини чи уьмуьр гуьзелди, секинди ва шадди хьун патал зегьмет чIугвазвачни? Дишегьлийрин агалкьунрикай рахайла, квез чи газетрай, телевиденидин экранрай, журналрай, дишегьли духтурри, муаллимри, карханайра кIвалахзавайбуру, чи артистри, манидарри, шаирри, компазиторри чIугвазвай зегьмет ачухдиз аквазва.
Гьелбетда, суварар – сад-вад йикъанбур я. Шадвални авуна кIанда, зегьметни чIугуна кIанда. Дидейрин хивяй са чIавузни акъат тийидай буржияр ава: аялар чIехи авун, аялар бахтлу авун, аялриз дуьз тербия гун. Алай вахт, советрин девирдин хьиз секинди туш. А вахтунда, чун пионерар, комсомолар, партиядин членар яз, эвел жуван, ахпа амай аялриз дуьз рехъ къалуриз вердиш хьанвай. Гила, гьатта школайрани кваз, тербиядиз са акьван фикир тагузвайла, чи арада жуьреба-жуьре кIеретIри, чеб авай къайдадиз гъун патал, чи аялар, диде-бубадин гуьзчивиликай хкудзава. Нетижаяр шад жедайбур туш. И карда, аялар дуьз тербияламишуна – дидейрин куьмек зурбади я.
Заз жуван и дишегьлийрин сувариз тебрик ихьтин келимайларди акьалтIариз кIанзава:
Гьуьрметлу дишегьлияр: дидеяр, уьмуьрдин юлдашар, вахар ва рушар, ша, чна, чи пак тир буржияр къенлай кьулухъни уьзуьагъвилелди кьиле тухуз, чи уьмуьр бахтлуди, секинди хьун патал, гьар сада вич авай кIвал, кIвалахзавай майишат, къуллугъзавай идара, жуван хуьр, район ва республика къени хьун патал, виридан яшайиш къулайди хьун патал зегьмет чIугван. Мегьамед пайгъамбарди женнет – дидедин кIвачерик ква лагьайди я. Дишегьлийри – эркекриз, эркекри дишегьлийриз гьуьрмет авуна кIанда. Дидедилай масан кас чахъ садахъни авайди туш.