Ст1ал Мислимат
ЗИ ШАД ГУЬГЬУЬЛ ХАЗ ТАХЬУЙ
Чил, мал, девлет кIан туш, дуьнья, заз хьайи,
Тек, уьмуьрда зи шад гуьгьуьл хаз тахьуй.
Къведайла зун, заз нефесдик кваз гайи
Кьефесдавай рикIин лувар хаз тахьуй.
Икрамда за цавун кьакьан гъетериз,
Илиф, лугьуз, зи межлисриз, мелериз.
ЦIиргъ кутада, вацрахъ галаз кьуьлериз,
Бейкефарна, зун къерехда таз тахьуй..
Сад Аллагьди жуваз эмир гайитIа,
Экв яз фида цавуз зун, гъед хьайитIа.
Пехилвиляй басмишна жув вирида,
Рехъ агална бахтун варар кьаз тахьуй.
Дуьнья катна - амукьна агакь тийиз,
КIевиз кьуртIан, рикI хуруда гьакь тийиз,
Вафасузри, гъейрибуруз чин тийиз,
Зи пак иви, иланри хьиз, хъваз тахьуй…
С-Мислимат. Зи шад гуьгьуьл хаз тахьуй!
© Copyright: Ахмедпаша Ахмедпашаев, 2014
Свидетельство о публикации №114030707860
Свидетельство о публикации №114030707860
Рецензии