С-Мислимат. Гъалибвал

             СтIал Мислимат
ГЪАЛИБВАЛ

Звериз-звериз   атай   вагьши
Парудилай   аватна,
Гардан   хана,    хьана   биши,
Кьил   кIвачерик   акатна…

Чир   хьайила,   акатайди
Вич  алемдин    нянедик,
Кьил   квахьайла,   вич акатна
Вичи   ягъай   гуьлледик.

Миллионар   телефнай   чи:
Пагьливанар - игитар,
Къарасуйра   тунай   чпин
Чан   аламай   мейитар.

Алчах,   мурдар   ивидивди
Бустанни   сал   кьацIурнай.
Чпин   кьацIай   баятривди
Чи   хандакIар   ацIурнай.

Терг   хьуй   душман,   терг   хьуй  дяве,
Адан   залан   крарни.
Катнай   Гитлер,   далудаллаз
Диши   ламран   пурарни.

Чи   ислягь   тир   багьа   хизан
Вучиз   гьарнихъ   чукIурнай?
Стхайриз   чи,    гзаф   масан
Вахтсуз   къванер   акIурнай.

А  вахтунин,   килиг   садра,
Ни   вилера   хъвер   ама?
Ишехьдай   кьван,   тутIуз  ара,
РикIе   алмасд(ин)   хер   ама.

Къе   са кьадар  хьанва йисар
Гъалибвилин    суварин.
Вуч   лугьурай, за рахана,
Къуват   фенвай  луварин.

Хкаж   хьанва   цавуз   гуьмбет,
Миллионрин   тIвар   алай.
ГьикI  эхда,  бес,   жегьилрин дерт,
Ракъинал   хьиз   зар   алай!?

Мез   рахада,   рикI   зурзада,
Вилера   шел   акIанва.
Дявед  цIукай   гьикI   рахада,
Къардаш   рикIел   хтанва…

Гъалибвилин   чIехи   сувар…
Мез   рахаз,   рикI   ишезва.
Бес   тахьана,    мад   душманар
Чинеба    чал   элкъвезва…

Ери   бине   гьалт   тавурай
Намус,   эдеб   течирбур,
Куь   гьахъ-гьисаб   гьикI авурай
Кепекдикни    квачирбур?

Дуьньядал   звал   къвез   хьайитIа,
Атай   сел   хьиз   алахьуй.
Душман    басрух   жез   хьайитIа,
Сад Аллагь   чи   пата   хьуй!

Намуслуда   вичин     тахсир
Я  масадал   вегьидач.
Гьич   садрани   вагьши   вичин
Магъарада   рекьидач.