СтIал. Мислимат. Яраб мад вуч жедатIа?

                СтIал Мислимат
ЯРАБ МАД ВУЧ ЖЕДАТIА?

Азад тир уьлкве, чилни цав секин,
Са къубудаллай жанавурни хеб...
Ишигълу кIвале, мердвилел эркин
Суса баладин эчIяйзавай кьеб…

КукIварна кьепIер, атIана тангар,
КIвахьна чиликай ишелрин накъвар.
Рябет кумачиз, хуьр-кIвал жез чара,
Вучиз атIанва икьван чи чара?

Вуч герек я чаз, хуьн паталди жув?
Чухвай верчервай гуз женни мад лув?
Садахъ кьуру гъил, садав яракь гва.
Тахсирни гузва кьейидан кIула.

Сад лукI жезва чун, садакай - «аллагь»,
Гьахъ лагьайтIа, гьич таб квачиз, валлагь,
Шейх хьанва хуьруьн, Аллагь течирди,
Бисми, эльгьем, дин, иман гвачирди.

Чир гьал акатна пулуник акьул,
Далу гужлудан ише физва къул.
Ва цIай акьурай, я кьей кесибвал!
Инсан я, лагьай, мус къведа тIвар вал?

Уьлквени хьанва чапхунчийрин муг,
Дуьнья тарашиз. Акьалтзава руг...
Я чирди амач гьахъ-гьисаб, дуван…
Кесиб, вид хьанва куьгьне кьер, бажгъан.

Ацукь тIалабиз Аллагьдивай гьахъ,
Лугьуз: «Тагуй ман пис касдиз на рехъ!»
«Инсан» тIвар алай гьар вагьши гьайван…
Авуй шумудан Худади дуван.

Зурлу кас кIан я хзандин кьилни.
Низ герек я экв тагудай вилни?
Я, Диде-Ватан, чкIанвай афар,
Гьинал ише фий чи кьуру гафар?!
                1995-й.