СтIал. Мислимат. Дуьньядин чарх элкъвезва

                СтIал Мислимат
ДУЬНЬЯДИН ЧАРХ ЭЛКЪВЕЗВА

Гьар инсандин чIар ккIанва гигиник…
Дуьньядин чарх ракъинилай элкъвезва.
Гигин са пад гагь винел жез, гагь кIаник,
Йисалай, къвез, лап кьил-кьилел хквезва.

Я гарувай, я зарбуна катдайла,
Галатзава гигинхъай чIар, бушзавай…
Кьазва кIевиз, инсан чилиз гьахьдайла,
Сад Аллагьди, вичин рикIиз хушзавай.

Гзаф кьадар балугъар хьиз, кIвадариз,
Суьрсет кIани чилни тазвач гишила.
Аб(у)рун са пай къерехрихъди гадариз,
Як яцIудалд чил хъуьрезва, хвешила.

Гар акьурла, аватзава гигинлай
КкIир чIарар, кIеви тушир, гъвечIибур.
Татаб хьайла, элкъуьрзава рикIинлай,
Яшлу хьанвай, акьул тамам кьуьзуьбур…

Писни-хъсан, белки, кьиле авачтIа,
Кутур, лугьуз, гъавурдик чи жегьилар…
Таб  я, чилел инсанар бул хьаначтIа…
Агакьзавач чпин яшдихъ эгьилар.

Гьалар михьиз чIур хьанва къе дуьньядин:
«Мода», лугьуз, чIуру крар аквазвай,
РикI кузва къе бубадинни дидедин,
Кьиле тефир, веледрин дерт чIугвазвай.

Фад я гьеле, куьн гъавурда акьада:
Куьд я тахсир, дуьньяд эхир ийизвай!
Гьахъ тир и гьал квез кьве вилелд аквада…
Зун тахсир яз аквамир, чIал кхьизавай.