СтIал. Мислимат. Я, инсан!

               СтIал Мислимат
Я, ИНСАН !

Чун арадиз къведалди, дуьнья ичIи тир,
Дуьньядиз экв чахъ галаз атана, инсан.
Перишан яз, гьар патан гуьгьуьл ичIи тир,
Муьгьуьббат гваз чун чилел атана, инсан.

Уях хьана чилни цав, тIебиат михьиз,
Ахварик квай накьарал хтанамаз чан.
Атана чи гьар неве цIийи бегьердиз,
Тепейрикай хьана чаз гуьлуьшан майдан.

Сад тирди чир хьайила дуьньядин Аллагь,
Чилин сагьиб иеси вун хьана, инсан.
Чирна вуна гьахъсузди вун тирди, валлагь,
Шумуд вуна телефна, кIур гана, инсан.

Аллагьдин тIвар кьаз сиве, гъилеваз яракь,
Экъичзавай бадгьавай инсанрин иви…
Бейниятар*, жерид туш Аллагь, иман квехъ,
Чилик пай гьич, кумукьич сурарикни куь.

Тежервални жегьнем я кесибдин кьисмет.
Бул авайбур – тух тежер невсинин лукIар.
Садбуруз я дуьньядин хажалат, гъам, дерт,
Къанихриз лукI тежербур ийидай кукIвар.

Вафалуди, къерех хьухь вагьшивиликай,
Инсанвилин, дуьзвилин авайд туш къимет.
Бед рахамир садрани къуншид кIваликай,
Нагьахъ телеф хьайид я агъзур са миллет.

*Бейниятар—бегьемсузар.