СтIал МИСЛИМАТ
РАХАЗВА РИЗКЬИ
Гьисаба дакьуна багьа чанни зи,
Яраб ни к1вачерик гадарнатIа зун?
Яраб гьи фурсахъан, тушиз зал рази,
Утагъдай акъудна, квадарнат1а зун.
Тум кьац1ай кицIериз хьана зун алчах,
Ч1агуриз фан кIусар, гадриз кIвачерик.
Яргъал ваъ, лугьуч за, агъугъ зи чIалахъ,
Тух йикъахъ гишинвал жедайла шерик.
Вучиз куь рик1елай алатнат1а зун,
Кавалдин чичIерай хчIалдай вахтар.
ЧIехи пай гишила хьана азарлу,
Югъни йиф ишехьиз акъуддай вахтар.
Ризкьи я, лугьуда, сагъвал, чан, иман…
Вучиз захъ амачтIа и кьадар гьуьрмет?
Ризкьи я сагъ чанни руфунин дарман,
Течирдаз чирда за эхир зи къимет.
Ризкьи я чан, иман, чандин я дарман,
Ризкьи я инсандал чан гъайидини.
Ризкьи я чан, иман, чандин я дарман,
Ризкьи я нефесдал ван гъайидини.
Вахчу гъвел, аватай, темен багъишиз,
Ризкьиндив садани тамир къаргъишиз.
СтIал. Мислимат. Рахазва ризкьин
© Copyright: Ахмедпаша Ахмедпашаев, 2014
Свидетельство о публикации №114030409120
Свидетельство о публикации №114030409120
Рецензии