Шииратдин мекке я

Мад дурнайри лув хугузва кефердихъ,
Яргъал рекьер, цифер, мекьер алудиз.
Зи вил гала халкьдихъ фидай сефердихъ,
КичІе тушиз, гьекь акъудиз далудиз.

Им са йис туш, шумуд агъзур асир я,
Луваривди атІуз яргъа мензилар.
Захъ авайди анжах тек тир са сир я,
Халкьдин дердер авун патал кьезилар.

Чахъ сад ава, дурнайрихъ кьве ватанар,
Сад - несилдин, кьвед лугьурди – асилдин.
Чахъ авай сад ам хуьз алахъ, инсанар!
Кьадар-кьисмет патал къвезмай несилдин.

Чун дурнаяр туш дегишриз ватанар,
Аллагь – Сад я, Ватанни - Сад, Дидени!
Ватандивай къакъатнавай инсанар,
Бахтлубурай гьисаб кьванни жедани?

Хайи чилел яшамиш хьун – са бахт я!
Вун иеси тир и чІехи алемдин.
Кьакьан тир цав дегиш тежер са тахт я,
Вун са нямет тир несилдин къелемдин.

Зи Ватан жув хайи хуьр я СтІалрин.
Эгер Женнет аватІа, ам захъ ава.
Тухум-тара, чебни чІехи кІватІалрин,
Захъ вилик физ, дуьз ва гьяркьуь рехъ ава.

Меркезар – квез, шегьерарни – квез хьурай!
Къакъудмир зун Ватандивай – Хуьруьвай!
Девлетарни, бегьерарни – квез хьурай,
Ийимир зун зи Чандивай, Хуьруьвай!

Ватан хуьдай ава чанни, турни заз,
Хайи хуьр заз дуьньядилай еке я!
Хайи хуьре кьисмет хьурай сурни заз,
Хайи хуьр зи – Шииратдин Мекке я!