Къайи йикъар алукьнава,
Кайи рик1ер алугнава,
Гъуцари чун таълукьнава
Рагъ ак1айла зи патав ша!
Вучиз вуна зи тар хана?
Сагъ тежедай азар гана,
Рик1ин къене цацар цана
Минет хьуй ваз, зи патав ша!
Аман, аллагь, т1ар хьана заз,
Зун дак1анди яр хьана заз,
Кьилин винел хар хьана заз
Инсаф ия, зи патав ша!
Гьар пакаман ц1ийи рагъ хьиз,
Гьар са нямет авай багъ хьиз,
Аруш хьана къацу тагъ хьиз
Рик1ин са пад, зи патав ша!
Экуь йикъар заз сар хьана,
Шегьре рекьер заз дар хьана,
Ви к1анивал заз пар хьана
Вилерин нур, зи патав ша!
Лекьер амач, пехъер къвезва,
Сверк1верикай цуьквер жезва,
Эхьда гьикьван - дердер незва
Аман, тават, зи патав ша!
Зи тарарал пеш кьурана,
Зи варарал векь кьурана,
Зи ч1арарал мег кьурана
Захъ чан амаз зи патав ша!
Ваз атир гуз, цуьк жеда зун,
Кьилел элкъвез нуьк1 жеда зун,
Ашкъидин ц1ай, руьхъ жеда зун
Эй эрзиман, зи патав ша!
Зи патав ша!
© Copyright: Шахмардан Арран, 2014
Свидетельство о публикации №114022211437
Свидетельство о публикации №114022211437
Рецензии