К1анивал
Икрам ийиз экъеч1завай ракъиниз,
За инжидлай хъвазвай таза ст1алар.
Руш ухшар тир лампадавай экуьниз,
Мертебаяр тир зи рик1ин хиялар.
Хар акатна, ачух дуьнья дар хьана,
Гатун цик1из квахьна адет чимивал:
Заз масанда "Дели чубан" т1вар гана,
Терг авуна зи хиялрин михьивал.
Хабарсуздиз ашкъидин ц1уз аватай,
Зи муьгьуьббат дагъларилай ч1ехи тир.
Начагъди хьиз, бедендик фул акатай,
Дугъриданни,кьарай квахьна, дели тир.
Вил ат1ай чар:"Зи тахсир я, азизди,
Гъалат1 хьана, къалгъандихъ к1вач галк1ана.
Кьил агъузна, темен гуда гъилиз ви-
Рик1 михьи яз, кьежей меци лагьана"
Тейижирди арифдардал алукьда,
Геж гъавурда гьатда,шем хьиз,кайиди.
Зар зак1алдин мержанар яз амукьда
"Зи к1аниди", "Играмиди", "Делиди".
Зул атана, йисар к1вахьна,пешер хьиз,
Ч1арарикни акатнава рехивал.
А вахт вилик ква,пакаман сегьер хьиз:
Са терездал К1анивални...деливал!
© Copyright: Камил Акимов, 2014
Свидетельство о публикации №114011608337
Свидетельство о публикации №114011608337
Рецензии