Аквазва

Хкаж хьанва 80 йисан синел вун,
Ваз дуьньядин писни хъсан аквазва.
Ацукьнаваз кьакьан дагъдин винел вун,
УькIуьд, цуруд, дустни душман аквазва.

Гьакъикъатда вун шииррин булах я,
Ви гафарал чун рикIивай чIалахъ я.
Вун чи панагь, вун чи даях, дамах я,
И кар элдиз язва аян, аквазва.

Хуш жезва ви яд инсанрин рикIериз,
Бегьер гъизва ви ятари никIериз,
Атир гъизва къизилгуьлдин цуьквериз,
ТагайтIани чна баян, аквазва.

Вун булах яз, саки гьуьл кьван дерин я,
Гагь лепеяр алаз, гагьни секин я,
Ятарни ви гатун юкъуз серин я,
Язва абур рикIин дарман, аквазва.

Вун са устад сеняткар я, шаир я,
Азиза ваз бахшзавайди шиир я.
Шаирвилин сенятда вун магьир я,
Ядигар яз Сулейманан аквазва.

Шииратдин Шалбуз дагъ яз,
Цуькверивди дигай багъ яз,
Къилх-хесет михьи агъ яз,
Чида чаз шаир Сажидин!
 
Пудкъанни цIувад яз яшар,
Ви уьмуьр я чIагай гатфар.
Кхьиз гуьзел бендер-гафар,
Бахтлу хьуй шаир Сажидин!
 
Югъди-йифди авай рекье,
Кутаз жеч вак гьич са рехне.
Шад межлисра жедай кIвенкIве,
КIудан хьуй шаир Сажидин!
                Азиз Мирзабеков