Арбен Къардаш, илгьам ганвай Эмина,
Шииратдин Шалбуз дагъдин кьил я вун.
Къадим лезги гафар твазвай демина,
Аламатдин туьнт «Лезгинка» кьуьл я вун!
Къилих –дугъри, рикІ куз багъри эллерихъ,
ЦІигел кас я мехъеррихъни мелерихъ.
Чир хьанайтІа, рехъ-къведай чи кІвалерихъ,
Зи эрчІи гъил, чина авай вил я вун.
Гьар са рекьяй чирвилер ви дерин я,
Заз кІаниди ви милаим хъуьруьн я.
Ви гьар са цІар кІелиз хуш я, ширин я,
ЧІалаз гегьенш, лепе алай гьуьл я вун!
Муг Рагъ хьана, къекъвез Махачкалада,
Хуьр акунихъ ви вил гьикьван галатIа?
Лезги халкьдин берекатлу талада,
Битмиш хьанвай сарубугъда къуьл я вун!
ЧІалар кхьиз чида лагьай чІалади,
Сажидин, ваз рахаз чир хьухь куьрелди.
Арбен Къардаш, фу нез вердиш гьалалди,
Сулейманан багъда авай гуьл я вун!
Арбен Къардаш
© Copyright: Сажидин Саидгасанов, 2014
Свидетельство о публикации №114010806910
Свидетельство о публикации №114010806910
Рецензии