Азиз Мирзебековаз

ДУСТАР АВА ГЬАР ЖУЬРЕ
Зи дуст Азиз Мирзебеговаз

Дустар ава гьар жуьре,
Гьар шегьерда, гьар хуьре,
КъекъвейтIан Къуба, Куьре,
Валлагь, Азиз хьтин дуст
Гьар цIудакай сад жеда!
И ван галукьай чIавуз
Гзафбуруз шад жеда.

Винел патай секин тир,
Самур вацI хьиз йигин тир,
Халкдин вилик эркин тир,
Валлагь, Азиз хьтин дуст
ЯхцIурдакай сад жеда!
И ван галукьай чIавуз
ХъуьтIуькайни гад жеда!

ЯхцIурни цIуд яшар тир,
Гафар-чIалар кIашар тир,
Шарвилидиз ухшар тир,
Валлагь, Азиз хьтин дуст
Агъзурдакай сад жеда!
И ван галукьай чIавуз
Пехил рикIер пад жеда!
10. 11. 2009

ДАГЪЛАРИЛАЙ КЬАКЬАН Я
Азиз Мирзебегован «Руьгьдин синер» ктаб кIелайдалай кьулухъ авур веревирдер
 
«Руьгьдин синер» дагъларилай кьакьан я,
Куьз лагьайтIа, абурухъ чан, руьгь ава.
Фитнед гуьлуьт хразвайди акьван я,
Гьулдан ятIан адахъ я чан, руьгь авач.

Чухсагъул, дуст, стха Азиз, ктабдай,
На лув гана лезги дагъдин синериз.
Ихтияр це вун стхадай гьисабдай,
Лезги тIалрин гьебе вегьей къуьнериз.

Лезги Нямет, Забит, Ризван, Байрам дуст,
Къуба патан цава куькIуьр гъетер я.
Вазни фу нез кIан хьайид туш гьарам, дуст,
ЦIап кIанибур пепеярни тIветIер я.

Хъсан затIар ви ктабда бул ава,
Фикир желбна гьар са кьили, цIарари.
Квехъ гьар са гаф лигимардай къул ава,
Гьикьван тади гайитIани цIаяри.

Ватандивай тахьуй бенде мусурман,
А дерт эхиз жедач зайиф касдивай.
Ватан я хьи чи гьар тIалдин са дарман,
Вун игит я, рикIе михьи къаст авай.

Аферин ваз, заз багъишай ктабдай,
Сажидин дуст кумукьдач ви буржуник.
Акур кьадар, чIугур кьадар азабдай,
Зун буржлу яз кумукьдач ви харжуник.

Эдебият, меденият, тарихар,
Зазни квез хьиз хуш я лезги миллетдин.
Чаз кьведазни ганвай лезги къилихар
Шагьни Шалбуз ятIа дагълар девлетдин?
2010

ШАД ХЪХЬУН НАМУМКИН Я, ДУСТ!
Азиз Мирзебеговаз

Ви хуравай Ватандин цIай,
Яд кIватIайтIан Самур вацIай,
Ам хкадриз четин я, дуст!

Чи лезги халкь, туп хьиз ацIай,
Акъудайди вичин кьацIай
Халкьдин душман, хаин я, дуст!

Лезги хурай кьацI авуна,
Самурдин мур вацI авуна.
Галукьайди батин я, дуст!

Чун дердерин яцI авуна,
Кьве стха яд кас авуна,
Шад хъхьун намумкин я, дуст!

АЗИЗ ДУСТ
Азиз Мирзебегован рушан мехъериз 
Мел-мехерар артух хьана эллериз,
Шадлухвилер акурай куь вилериз.

Берекатар артух хьана чуьллериз,
Вили цавар, рагъ-къизилдин гуьл галаз,
Шад межлисар, далдам-зуьрнед зил галаз,
Кьисмет хьурай квез гьар са югъ, Азиз дуст!

Хтулринни птулринни мехъерар,
Гьадахъ галаз амай вири рекьерай,
Шадвилердай, чахъ сагъ чанар, пул хьана,
Цуьк акъатун патал къекъвей рекьерай,
Хъсанвилер и дуьньядал бул хьана!
Кьисмет хьурай квез гьар са югъ, Азиз дуст!

Сажидинни куьревияр ад авай,
Квез к1анибур гьа зун хьтин мад ава,
Ихтияр це заз абурун патахъай,
Мубаракдай квез и мехъер шад авай.
Гвен гуьналди куьтягь тежер гад авай,
Кьисмет хьурай квез гьар са югъ, Азиз дуст!
14.10.2012