Имам дуст

Гьар са таран бурж я дувул дериндиз
Рекье туна, ем хъун чилин шириндиз.
Уьмуьр куьтягь жезватIани сериндиз,
Хуш кьабулиз гьазур я зун, Имам дуст!

ЦIайлапандин зарбвал квай затI-вахт я, вахт.
Жуван халкьдин векил хьунухь-бахт я, бахт.
Шаирвилин жагъур ийиз кьакьан тахт,
Къекъвезва зун чириз гьар са улам, дуст!

Ибни Синни-камалэгьли ариф тир,
Низамини-еке шаир-мариф тир.
Жавагьирар туна, рекьиз гьайиф тир,
Шаиррикай сад я, заз чиз, Хайям дуст!

Леонардо да Винчидин зегьметар,
Кваз такьуна, фена тагуз къиметар.
Чан аламаз тачагъайла гьуьрметар,
Амачирдан квез я чекме, шалам, дуст!

Гьисабмир зун нарази яз хьайидал.
Шукур гъизва Сад Аллагьди гайидал.
Ажеб хьана вун зи дуст яз хьайидал,
И кIвалахдиз шагьид я чи алам, дуст!

Фин паталди уьмуьрдин дуьз рехъ кьуна,
За жуван герб Азадвилин Лекь кьуна.
Халкь паталди зегьмет чIугун гьахъ кьуна,
Жуван буржи ийизва за давам, дуст!

Гьар садан бахт - хкаж хьана цавариз,
Уьмуьрдин вахт тешпигь хьурай сувариз.
Арабир зун рикIел атай чIавариз,
Рекье тур заз хийир-дуьа-салам, дуст!

Аферин ваз, вун камаллу лезги я,
Халкь паталди ишигъ гузвай гуьзгуь я.
Зун валайни Аллагьдилай рази я,
ТуштIани зи гьич са кIвалах тамам, дуст!

Шаирдизни емиш гъизвай къелемдиз,
КIан я чпин бегьерар гуз алемдиз.
Жув халкьдин тIал сагъар хъийир мелгьемдиз
ЭлкъвенайтIа, кIанзавай заз, Имам дуст!