Йикъарни варцар алудна йисан,
Баркаллувилин рикIе аваз гьисс;
Чи гьар са кIвалах ийиз кIанз хъсан,
Дуьньядин винел ислягь уьмуьр хуьз;
Мугьман жезва чаз виридаз масан,
Медениятдин муштулух гвай йис!
Кьве агъзур йисан рикIел гъиз тарих,
Анжах виликди фин патал крар;
Азадвилерихъ мидаим къаних,
Ислягьбур хьуриз экуьнин ярар;
Мугьман жезва чаз квачир са синих,
Медениятдин муштулух гвай йис!
ХъуьтIуьн юкь ятIан – живерин гьамбар,
Квазни такьуна мекьерни къаяр;
Вирибуруз хуш – мугьман барабар;
ЦIийи тир йисан кьуна хьиз паяр,
Мугьман хьанва чаз гуз шад тир хабар,
Медениятдин муштулух гвай йис!
Эдебиятда, медениятда,
Тун патал цIийи тир дегишвилер;
Хъсан хиялар аваз ниятда,
Ша, зегьмет чIугван, азиз тир эллер!
Мугьман жеда чаз шад яз гьасятда,
Медениятдин муштулух гвай йис!
2014 ЙИС
© Copyright: Сажидин Саидгасанов, 2013
Свидетельство о публикации №113122804644
Свидетельство о публикации №113122804644
Рецензии
