Куьз киснава

Куьз киснава Шагьни Шалбуз?
Квехъ гьи кьадар сабур ава?!
Лезгистандин халкь я ялгъуз,
Квехъ такабур-абур ава!

Вили цава экуь гъетер,
Чаз тамашиз сефил ятIа?
Ватандихъ рикI кузвай бейтер,
Зи дарман-сенжефил ятIа?

Гьикьван эхда на Кьулан вацI?
Са беден кьве пад хьанва хьи!
Лезги рикIяй акъудна кьацI,
Кьаркьулувар кIватI хьанва хьи!

Рахунар чи пара хьанва,
ХъуьтIуьн йикьни гъиляй текъвез,
Халкьарин фу тара хьанва,
Дуьз фикирар кьиляй текъвез.

Садвиликай ийиз гафар,
Чи гьал мадни пис жезва хьи!
Тух хьайибур, тIуьна афар,
Ядни хъвана кис жезва хьи!

Са вил хъуьрез, са вил ишез,
Мецивай дуьз рахаз женни?
Хаинри ви девлет къечез,
Мез аваз, лал акъваз женни?

Шарвилидал чан хкиз кIанз,
Чун серинрик чуьнуьх жедан?
Квез тарихра тIвар кхьиз кIанз,
Ам Лезгистан хуьнуьх жедан?

Кар чкадал атай чIавуз,
Шарвилияр герек жезва.
РикI пердедай атIай чIавуз,
Сад-вадаз фу, хуьрек жезва.

Жафа хьана и чи гьалар,
ГьакI гафар-чIалар хьайитIа.
Халкьдин чанда туна ялар,
Чун цацар-валар хьайитIа.

Низ лугьун, низ ийин гьарай?
Аллагь пара цава  ава.
Сад жедалди авач кьарай,
Де лагь, чун низ тIува ава?!

Сажидин, ви вил нел ала?
Игит ятIа, чан це жува!
Гьамиша вил рекьел алай,
Яланчийриз къван це жува!!!