Ажайиббур хьанва вахтар Рази жед захъ галаз халкьа

Ажайиббур хьанва вахтар
Рази жед захъ галаз халкьар...

Завод, фабрик совет девир
Харап1 акваз ханва пехир,
Малар хуьдай, цадай чилер
К1ус-к1уснава тагуз бегьер.

Хзан кутур жегьил-агьил
Фагьумрик ква: гьик1 хуьда кьил?
Эхтилатриз гайт1а къимет
Яргъал мензил жезва кьисмет.

Са кардикай язва аян
Кеспи гузмач гьанра хъсан,
Къавкъазвияр гьатта пата
Тазмачалда, ялда хата.

Дагъви папар ат1ай чара
Физва къазанмишиз пара,
Агакьнавай, са гьал, гъвеч1и
Веледар гваз эркек диши.

Мегаполисра лап ч1ехи
Кьазва чи аялри ягъи
Дагъвидиз хас тушир ерли
Эдебсуз, гьаясуз терби.

Аквадат1а лагь нин тахсир,
Хтайлахъди ийиз таъсир
Урус лезги какахьиз ч1ал
Жеда абур акъудиз къал.

Бязибурухъ яргъи чуру,
Бязибурал ч1улав чадру,
Садан жендек ят1а кьец1ил,
Муькуьдаз герек я биц1ил.

Садан чинал ала сувагъ,
Садан сивел алач къалпагъ,
И рухвайрихъ  чун гьик1 ягъан,
Рушаркай хьуй нин цлан къван??

Данад хьиз тум кьац1ай фитяй
Вегьедайвал нехир виляй,
Са вад-ц1уда хиве такьаз
Маса гузва вири Къавкъаз.