Я чан аллагь, гьикьван вахт я яр такваз,
Зулун юкъуз уьмуьрдиз "зул" атана.
Рик1 пад жезва гегьенш дуьня дар акваз,
Турфан хьана марфадин кул атана.
Яраб гатфар хкведач жал мад сефер?
Вучиз зулуз ихьтин к1валах хьана заз?
Цуру ийиз к1анибурун шад кефер
Душманчивал ава зулун захъ галаз
Хабарсуз я дурнайрин куьч хъфизвай
Къекъифнавай зи ашкъидин гьалдикай.
Гагь къайи жез, гагьни къизгъин ифизвай
Зи чандавай бизардикай, т1алдикай.
Дак1ардай зун килигзава тарариз
Перишанвал гьаким хьанва гьар патаз,
Тек са гару вагьшида хьиз гьарайиз
Закай хабар кьазва, ада рак гатаз.
Ашкъидин нур туькъуьнзавай эквер хьиз
Амукьзавач бедендиз фул атана.
Шуьткьвена хьи зи мурадар цуьквер хьиз
Зулун юкъуз уьмуьрдиз "зул" атана.
Уьмуьрдин зул
© Copyright: Шахмардан Арран, 2013
Свидетельство о публикации №113111304471
Свидетельство о публикации №113111304471
Рецензии