Кузь тюркюсини кедерли йырлай,
Паркимде бом-бош… кок биле агълай.
Тек янъгъыз еллер кезинип юре
Ве салынджакъны титрете бере.
Къырылды умют, юрегим яна…
Айт, аначыгъым, не олды манъа?
Бу ерде чокътан кунешчик сёнген,
Шенъ келеджекке инамым ольген.
Эр шейни сонъра гъамнен анъладым,
Недир шу севги, аджджы агъладым.
Къаврадым, яндым, ярыкъ корьмедим,
Арзу йипинен бахтны орьмедим.
Къысметим, санъа даа не керек?
Агъырып къалгъан, къыйналгъан юрек
Бу дюньяда ич тапмады ерчик,
Ич токътамады аджувсыз ельчик.
Аллахым, бер кучь сынавдан кечмек!
Темиз чокъракътан салкъын сув ичмек!
Эгер тапмасам кендиме сабыр,
Сонъ бир кунь мени ольдюрир агъры.
Салынджакъ энди эм бом-бош олды
Эм гонъюлимни бошлукънен сарды...
Паркимде гизли, токътала еллер,
Санки бир тынчлыкъ, борандан эвель…
Апрель 28, 2006
Паркимде бом-бош
© Copyright: Эльмара Мустафа, 2013
Свидетельство о публикации №113110108977
Свидетельство о публикации №113110108977
Рецензии