Неш-уршила гIямру

Кагъатике тIаррукIуле руар неш.
Туснахъизела ушибил уршила.
-АхIарил, це баририра вайдеш?
Цес дулхъяхъида хIаке уркIи нешла?

Савладуги шадикибил замайзе,
Гьавхъун, "хIаврус иле уэс туснахъизе".
ХIаврус кехIабаэс дурала шадеш,
"АхIарил", хIаке левкьулра гьанна неш.

Муэлзе тIама аргъиле уршила,
ЛамбукIуле бехIбихьиб уркIи нешла.
Дугила ца-цугизе дурарухъун,
Це хабар лебара иле уршила?!

Буиб нешла уркIи гъаб-гъаб букIуле,
Карикиб гонзалике ахъри дегъуле.
Дардли руциле гIязизил неш ребкIиб,
Урши цуния кейэс бикхIабикиб.

Уршили хъулидяхIле чIяпIбарилри.
Вай, неш ребкIибил хабар аргъхIяргъилри.
Хъули левкьуй гьуни баргес хIаврулри,
Хугина дузизе агор угьулри.

Милицумбе арагъакан бикилри.
Дузла духIна варгес хIабурулри,
Гьахъкан гъаралди кебаиле бяхъиб.
Тупангла хIяра кьяшизе агиб.

ИтI дяхъила кьяшичу хъали баргиб.
Хъули тIаррукIуле жан неш хIараргиб.
Нешли дуния батунил багьува,
Нешла цIелдала мякьла чIяпIбариб.

Нешла цIелдала мякьла кайъиб.
Керрерхонгъа иле тилади бариб.
ХIярела нешли жаваб чархIабариб.
Нешла хIябла мякьла уршира эбкIиб.