Жаваб це заз, Эгейдин гьуьл

Атанва зун мугьман яз ви,
Шумуд югъ я, Эгейдин гьуьл,
Дамарда гьикI, ргаз иви,
Вун акунал шад я гуьгьул.

Ракъурна зун саламар гваз
Лезги чили, ацIурна гин.
Кьабулзавай, баркалла ваз,
Икьван милиз ахъайна чин.

Яраб вучиз верц1и ятIа
Иервал ви, лепеяр ви?
Са авсият ваз аватIа,
Чи Каспидихъ галаз белки?

Белки, ятIа куьн стхаяр,
Дегь чIавалай чаз чин тийиз?
Белкини, куьн ятIа таяр,
Са вахтунда, хайибур хьиз?

Якъин хьи, ваз ава хабар,
Тарихдин сур къатарикай,
Алуда зи рикIин къабар,
Рахух вун чи патарикай.

Лагь вуна заз, чидайни ваз
"Кас" лугьудай чи бубаяр,
Къведайни куьн галай патаз
Пелазгияр-хванахваяр?

Лугьумир на: алат залай,
Вач кеф чIугу, вирида хьиз,
ЭкIягьа цик зи кьел галай,
Байиха жув гъерида хьиз.

Лагь кван, гьинай атанатIа,
Каспидин тIвар, чаз сейли тир?
Вуна зи къаст кьатIанатIа,
Мискьивалмир, ахъая сир!

«Кас»  гафунихъ  гала вучиз
Грек чIалан гилитI тир «пи»?
Лугьумир заз, сефилдиз хьиз:
Жагъура са маса кеспи!


Давудан сур къалура заз!
Родос акьван чIехи яни?
Къагьриманвал чандик кутаз,
Байихдайвал а руьгь зани!


...АмачтIани кьарай мад заз,
ХьанватIани ватандихъ вил,
Ви жавабрихъ умуд галаз,
Гузьзетда за,Эгейдин гьуьл…

           Июль 2011. Бодрум. Эгей.