ЗекIо тэкIо

ГъэшIэгъоны мы дунаир,
Джэнэт папкIэу баир.
Дахэ ар, дэгъу утетынкIэ,
ЩыIэныгъэр щыбгъэкIонкIэ.
Мы къэсIуагъэр къыгъэшъыпкъэу,
Усэ къэсшIы сэ сшIоигъу.
СфэлъэкIытымкIэ сишъыпкъэу,
КъэсIотэт ар, уахътэм игъу.
«Мо къэдаIу зэ сидэIуакIу»…
Ошъо шхъуантIэм ыгъунапкъэ,
Iутхахьыгъэу тыгъэр Iут.
Ар мэшIэты зэпэлыдэу,
Инэбзыйхэр мэшIо тхъуабзэу,
Дунаишхор къагъэнэфы,
Зынэсыгъэр агъэчэфы.
А нэфынэм икъежьапIэм,
Зэхэхьажьы  чIыгуи,  уашъуи.
А чIыпIалъэм огум икIэу,
ОшъогучIэр  зэлъиубытэу,
Къушъхьэ лъагэ чIым къыхэкIы,
Ошъогупщэм ар пхырэкIы.
А инышхом тыгъэр тепсэшъ,
МашIом фэдэу къыкIегъанэшъ,
Дышъэм фэдэу ар мэлыды,
Мэужъустхэ ар мэшIэты.
Дышъа сэIо мыр,
Тынэ рикIэу, мырэу лыдыр?
«СидэIуакIу»-тэрэзыIоу зыкъэфапи,
Тыкъэгъаплъ  тыгъакIуи.
ГумэкIыгъо  уисымгъафэу,
УлэупIэ къыомыкIоу,
Лъэтемытэу узгъэсын,
Щыхъурэр зэкIэ къэплъэгъун…

Лыды - пкIыдэу а тлъэгъугъэм,
Зэпэлыдэу дгъэшIэгъуагъэм,
Джы ышъхьапэ тэ тыпыт,
Зытэплъахьышъ тэ тыщыт.
Шъуабэу осыр нэм кIэджаго,
Налмэс-налкъутэу зэпэджэгу,
Дахэ, дахэшъ уемыплъэкI,
Бэрэ уеплъын умылъэкI.
Хъурэябзэу зэ зыплъахьи,
ЧIыгуи, уашъуи о къэплъахьи,
Нахь шIагъуи о плъэгъут,
БгъэшIэгъоны ар икъут.
Бэ пэмытэу мы ошъуагъэм,
Ташъхьагъ итэу, а тлъэгъугъэм,

ТачIэгъ чIэтэу пщэхэр щесы,
ЗэбгъодэкIэу щызэблэсы.
Джы нэплъэгъур баи хъугъэшъ,
Зыфэягъэр  къыдэхъугъэшъ,
Ащ къылъэгъоу бэ къеубыты,
Дунаишхор зэлъеубыты.
Мары псыхъохэр,  осыр жъугъэу,
Мыщ къыщежьэх  псыжъотжъугъэу.
Чыжьэу, чыжьэу ахэр мачъэх,
Шъхьафитныгъэм ахэр фачъэх.
ТэдкIи мэзы, шъофы, цыпэ яIэп,

Чыли къали джы тачIэгъых,
Ахэр дэгъоу джы тэлъэгъух.
Мы о плъэгъурэр гъэшIэгъонба ,
ПIыгъышъутмэ къыостынба.
ПIэхэр  щэи ар убыт,
Уинэплъэгъуи ащ теубыт.
Ефэх дэгъоу Iэгум ахэр,
Хъурэябзэу зэкIэ дахэр.
КъызэхьылIи нэм ехьылI,
Джащтмэ Iэгум нахь ифэтых,
П1эгу итэу нахь плъэгъутых.
Бэрэ пIыгъы ахэр хъутхэп,
Мылъку ахэр о пфэхъутхэп.
А къэсIуагъэр къыгъэнафэу,
Жьы фыртынэр мыщ къыщежьэ,
Жьы корены ар къэхъугъэу,
Осэу телъыр ащ рехьыжьэ,
КъыоIукIэ, урефыжьэ.
Дэпкъым фэдэу ар къэуцу,
Тыгъэу нэфрэм ар пэуцу.
Бгъэгубжыгъэ псынкIэу къех!
А чIыпIалъэм зыIуегъэх!
УщыкIонкIэ къины пщэхъу,
Ипытагъэ ащ улъэхъу,
Утеуцомэ зэгозы,
Осы куум упхырэзы.
Уахътэр макIо, тэ тыкъакIо,
ТыкъыхэкIы, а фыртынэм,
Джы тыкъэсы, осы гъунэм,
Тыгъэ шIэтри къытпэгъокIы. 
ЧIыпIэ-чIыпIэу уцы шхъуантIэр,
Шъэбэ-шъабэу лантIэр,
Осы чIэгъым къышIучIэкIы,
Тыгъэ фабэм ар къегъэкIы.
Уехы къэсы нахь къэфабэ,
Уцышъуабэри  нахь къабэ…

Ос телъыжьэп, ос щыIэжьэп,
Псы ар хъугъэшъ, дэтэу хъуатэм,
Зэрэугъоишъ мачъэ псыхъом .
Псыхъоу чъэрэм мо къекIуалIи,
Зыгъэпсэф, мыщ къэтIысхьи.
КъэхъугъакIэшъ мы псы цIыкIур,
Фэдэу къабзэ кIэлэцIыкIум.
ЗытхьэкIахьи, зылъэкIахьи,
ЗыхэуIуби псы тIэкIу ешъуи,
Уигопэгъу гъэIасэ,
Уипкъышъол гъэразэ.
Псыхъо цIыкIур чэфэу мачъэ,
ЗиIонтIахьзэ хъуатэм рэчъэ,
КъыддеIагъэшъ игушIуагъу,
Тэри ары, тыгушIуагъ.
Техын фае, уахътэр макIо,
Псым тыготэу тэ тыкъакIо,
Ащ ичъэри, иинагъи
Ренэу хахъо, икIочIагъи.
Ар мэтхъурбэ, мэбыжъутэ,
Къушъхьэ тIуакIэр ащ делъыкIы,
Мыжъо-сыным, ащ хехыкIы.

А  чIыпIалъэм тыкъэсыгъ,
Тигъогу лъагъо ащ къекIугъ.
Псыр ечъэхрэп, ар ефэхы,
Зегъэлъатэшъ ар епкIэхы.
А куушхом ефэхыгъэр,
Бэ пэмытэу джыри псыгъэр,
Мины пчъагъэу зэIеуты,
Тхъужъэутэу ар еутэ.
УзеплъыхкIэ гур пIэпехы,
Икууагъэ угу ащ рехы.
«СидэIуакIу» - мы чIыпIалъэр,
ГъэпсэфыпIэу хэтэгъэхи,
Зыгъэпсэф мо къэтIысхьи .
НэIур огум зэ фэгъаз,
Уашъор къаргъо ар шхъонтIабз.
Тыгъэ нэфыр ыгузэгоу,
Дунаишхор къегъэфабэ,
Зытепсагъэм, зэпэшIэтэу,
Ыгу егъэткIу, егъэшъабэ.
Пщэ зырызхэр мыгумэкIэу,
БгъуитIукIэ къэкIхэу,
Ошъо къаргъом щызэблэсых,
Къуахьым фэдэу ахэр есых.
Мы о плъэгъурэм уегъэгушхо,
Къин лъэгъугъэр пщегъэгъупшэ.
КIэдэIукIзэ псэу ефэхрэм,
Зыгъэпсэф о тыгъэр ехфэ…

Къэсыгъ игъо къэущыжь,
Мы чIыпIалъэр къэплъахьыжь.
Тыгъэ плъыжьыр гъунэм Iутэу,
Егъэнэфы уашъор хьаржъоу.
Мы чIыпIалъэм псэу ефэхрэр,
Мины пчъагъэу зэIиутрэр,
Лыды пкIыдэу къыдэлыды,
ЗэпэшIэтэу зэпэлыды.
«СидэIуакIу»-къыдрекIокIи
Мо зэ къакIо - плъакIо.
Мыщ ычIэгъкIэ нахь шIагъу,
Ар сэ лъэшэу сэгъэшIагъу.
Ошъо къопсыр мыщ щэлыды,
Тыгъэ шIэтым ар пэлыды.
Ар мэзекIо чIыпIэ итрэп,
Фэдэу дахэ  о плъэгъгъэп .
Лъэшэу IэшIушъ, узэIуехьэ,
А чIыпIалъэм  жьэу къыпыкIрэм,
Бгъэм дэфэжьрэп,  узэрехьэ.

Мы чIыпIалъэу тыздэщытым,
Ины, дахэ мэзэу щытыр.
Тыхэхьат ащ, блэкIыпIэ иIэп,
Къэтыуахьынэу уахътэ тиIэп.
Техы, чъыгхэр ины мэхъу,
ИкIырыгъэ мэзым хахъо,
Нэфыр макIэу ащ хэнафэ,
Уахътэр макIо, хэкIы мафэм.
Тыгъэр къуахьэшъ къэушIункIы,
Псым тыкъекIу, мыщ тыхэкIы.
Мэзы шъофэу, мэз лъэгъуанэу,
Псыхъом Iутым тыкъыIохьэ,
Чъыгэу щылъым - тимэшIуапхъэу,
ТымышIахэу тыкIэрэхьэ.
МашIор сыдкIэ хэдгъэнэщта,
Тэ нэфынчъэу тыкъэнэщта?
МыжъокIитIур зэуутэкIын,
МэшIо тхъуабзэр хебгъэхын.
Мары мыжъор хъоеу щылъ,
Ащ о бэрэ упымылъ.
МашIор шIэхэу зэхэгъани,
Чэщыр чъыIэшъ, зыфэпэжьи,
КъэмыушIукIзэ о гъолъыжь,
ЗыгъэIаси хэчъыежь…

Жъогъо быныр къетэкъокIэу,
Ошъо шIункIыр ыгъэнэфэу,
Мэзэ лыдыр уашъом ит,
Къегъэнэфышъ къытшъхьарыт.
ПсынкIэу плъэгъурэм уегъэIасэ,
УкIэрыплъызэ уашъом итым
Чъые IэшIум ухелъасэ…

Бэп  тешIагъэр, тызыIэсагъэр,
Хъурэябзэу кIы-кIыкI макъ,
Гур пIэпихэу - чэщ лъэмакъ.
ХьэкIэ - къуакIэу хизэу хэсыр,
Тэ  къытэкIу,  ахэр  къэсы.
МашIом фэдэу нэ лыдыжъхэр,
Мэзы Iапчъэм къычIэлыдых,
Чанэу, папцIэу ахэр дыдых.
Пэтэгъадзи машIом стыпхъэр,
Чъыгэу щылъым щыщ пхъэгъугъэр,
Ар залъэгъукIэ  къибыбыкIэу-
МэшIо бзыеу нэр къырикIэу-
ЗэкIэужэу кIаIэжьыт,
Iэсэ-лъасэ тыхъужьыт.
Ары сэIо, о олъэгъуба,
ТэркIэ дэгъуба, хъунба,
Мачъэх ахэр къэмыуцоу,
Лъакъор чIыгум темыуцоу.
МэшIо нэфэу «Саусэрыкъо»,
Ц1ыфмэ къыхьи къаритыгъэр,
Джы къынэсы ащ яIагъэр,
Сыды хъункIи умгъэкIуасэ,
ЗэрэплъэкIэу ар гъэкIасэ.
МашIом чъыIэм тегъэфабэ,
Тыгухэр, тпкъыхэр егъэшъабэ.
Чэщы шIункIы къызэрэхъоу,
Къытфэнэфы остыгъэ нэфэу.

Бырысырыр ащ щыуцурэп,
Тычъыенэу уахътэ къэхъурэп.
Мэзыр псаушъ, щыIэшъ,
Мэкъэ Iаджи къыхэIукIы,
Гуих щтагъор къыпэIукIы.
Сыдэу щтагъуа мэзы шIункIыр,
Уигъэщтэнэу иI ащ лъэкIыр.
Зэ къэшъуе, зэ къэбыу, зэ къэшIуи,
Сабый макъэу ар къэкIыи,
Ар къэкуо, хэгырзыкIы.
Чъыг иныжъыр къэгумэкIы,
Икъутамэхэр  къэкIыкIы,
ПкIашъэу пытхэр зэIушъашъэ,
НэгъучIыцэр къэIушъашъэ.
КIышъо шъхьацыр еджы,
Пыжъы панэу къегъэтэджы,
Гур ащ рехы,  паIор пщехы.
Ар имыкъоу чIыр къэгырзы,
ТIэкIу-тIэкIоу ар къэсысы.
Умыщт «СидэIуакIу»,
Икъэбар ащ,  сэ осIот,
ЗыкIэсысрэр  осIотэт.

Тидунае къызежьакIэм,
ЦIыфы пстэур къызэхъукIэм,
Иныжъ джадэхэр щыIагъэх,
ЦIыфхэм, пыеу тэ тиIагъэх.
А Iэежъхэр джы щыIэжьхэп,
Уалъыхъутми, бгъотыжьытхэп.
КIодыкIае ахэр хъугъэх,
Зы нэбгырэ нэпэмыкI,
Иинагъэ нэр къырикI.
Жэм дэфэтэп, а иныжъым-
Гуих-щтагъоу, а пцIэпIэжъым,
Жъалымагъэу зэрихьагъэр,
Ащ гонахьэу ыгъэхъагъэр.
Псэ иIагъэп, а Iэежъым,
Жъалымэжъэу а пцIэпIэжъым.
Псэ зимыIэм сыд епшIэна,
Пфыхэхына ыпсэ, пфэукIына?
Ыухыпэ цIыфхэр зэхъум,
А шъэджашъэу лIыхъум-
ФэмыщаIэу  игъэпсыкIэ,
Фэмылъэгъоу ипсэукIэ,
Алахь-Талэм ащ риIуагъ:
«ПшIэрэр хъущтэп мардж хъужьын,
Зэ Iэсэжь - жъалымагъэр о хэнэжь».
«Сымыуцумэ сыд о пшIэщтыр,
Сыд щтагъуа къысэпшIэщтыр?»,
ЦIыфы лэпсым ешъошъ щыс,
Мэщхышъ, щыуанышхом ар кIэрыс.
Алахь-Талэр мо къэгубжи,
ЧIыгу шъхьашъор зэгуиути,
ТIуакIэ хъугъэм ар дидзагъ,
Мыжъо-сынэу онтэгъушхор,
Шъуамбгъоу, лъагэу, иныжъышхор
Къыхьи ычыIу тырилъхьагъ.
КIуачIэу иIэр зыдимышIэу,
Бэрэ къеуагъ, пшъыр ымышIэу.
Мыжъо-сыным къыпхырефы,
Къушъхьэ  мыжъом  ащ къыхефы,
Ау инышъ, Iужъушъ, тыридзышъурэп,
Хьапсэу иIэм къычIэкIышъурэп.
Мары къушъхьэу къыIэтыгъэм,
А инышхоу къыхифыгъэм,
Орырэ-сэрырэ джы тытет,
Ащ ихьапсэ ычыIу тит.
Зы лIэшIэгъум зэ ар къео,
Джы мэчъые, пырхъым ео.
Тыгъэгугъ:
Алахь-Талэр къддеIэнэу,
А 1эежъым фэсакъынэу.

«СидэIуакIу»,
Укъэмыщт о, зэ рэхьат,
Мыщ щыхъущтыр сIэ къихьат,
Сэры зэкIэ, фитыр, хъутым,
Зэхэтхытэу тэ тлъэгъутым.
Джы тимэшIо-нэфы,
Стыпхъэр пизэу пэтэгъалъхьи,
Къызэрэхъоу  псынкIэу чэфы,
Тыгъэчъый, тыгъэгъолъи…

Чэщыр мэпшъы, нэфыр къэшъы.
Тыгъэ нэфыр къыкъокIыгъэшъ,
Ошъо шхъуант1эм ар къихьагъэшъ,
Ащ ублапIэ мафэм фешIы,
Тытэджынэу тэри тешIы.
Бзыумэ жъынчэу орэд къаIо,
Мэфэ нэфым ар къыфаIо.
Тыгъэу плъыжьыр -  жъокум фэдэу,
Зытепсагъэр хьаржъоу,  шIэтэу,
Огу хышхом къыдэкIуае,
Дышъэ чэтэу ар мэлъае.
Къыгъэфабэу, зэпэнэфэу,
Мы мэзышхом ар къыхаплъэ,
Ышъо шхъуантIэ - ешIы гъуаплъэ.
Псыхъом хапсэшъ къыпэлыды,
Ащ итIуанэу ар къыхэплъы.

Мэзым хэсыр къэущыгъэу,
Фэгъэш1ыгъэу, фэгъэсагъэу,
Шъхьадж иIофы ыуж ит,
ЫIот, ышIэтым ар фит.
Мары тхьакIумкIахьэу,
Щтэпхэ цIыкIур, зимыш1эжьэу,
ПкIэтэ-лъатэу речъэкIыгъ.
Ыуж итэу бэджэ пцIапIэу,
ТхьагъыпцI-цIыкIур, блэхъушъутыгъ.
Къо Iэхъогъур, гъунтIы-сынтIыхэу,
ЗэкIэужэу лъагъом  рэкIох,
Псы ешъонхэу, псыхъом макIох.
Мэзы шъофым къилъэдагъэу,
Шъыхьэ дахэм зешIытэжьы,
Мышъэу гъоргырэм ыгъэщтагъэу,
Мэзы кIырым ар хэпкIэжьы.
ПсыIум, чъыгэу Iутым пысэу,
Куку цIыкIум еIошъ -  ку-куу,
Илъэс пчъагъэр къытфелъытэ,
Зигъэпсэфзэ ар мэлъытэ.
Дыригъаштэу пхъэуIу пхъашIэр,
Пэмычыжьэу мыщ  щэпхъашIэ.

Ар  къытажэ - псыхъо-жъыу,
Тэ,   къэсыгъэшъ тичэзыу.
Псыхъом Iухьи  зытхьэкIахь,
Ешъуи чъыIэу псы тIэкIу,
КIакIи, тхьакIи унэкIу,
Тэ тигъогуи  тытегъахь,
Псым тыготэу мыщ тегъэх.
Уехы къэсы псым къыхахъо,
Ины мэхъу, псыр мэхъуахъо.
Псыхъо цIыкIухэр къыхэлъадэ,
Ахэр чэфхэу зэхэлъадэ.
Уахътэр макIо, мафэр макIо.
Ташъхьагъ шъыпкъэ къиуцуагъэу,
Инэплъэгъу къыттридзагъэу,
Тыгъэ шIэтым тегъэфабэ,
Тпкъыхэр шъабэу егъэлабэ.

Псэу тызготыр джадэ хъугъэ,
Жъугъэу къиуи зиушъомбгъугъэ.
Адырабгъу ащ чыжьэ-дэд,
Къэмылъагъом нэпкъыр фэд.
«СидэIуакIу»
Нэпкъым благъэу угомыхь,
Псым Iогъу-шIэгъоу упымыхь.
Мы пцIэпIэжъыр бзаджэ хъугъэшъ,
Куоу, шъуамбгъоу зиубгъугъэшъ,
ЗимышIэжьэу лъэшэу мачъэ,
Блэгъо-хъуахъоу  хъуатэм рэчъэ.
Нэпкъым къеошъ къыгуеуты,
Тетыр къеIэшъ ретыгъохы.
Зыфэгъази псыхъом хаплъ,
Хъурджэ машэмэ, зэ яплъ-
Псычэрэгъухэр лъэшэу щтагъох,
Уалъэшъунэу псычIэм лъагъох.
Ащ ифагъэр къытIупщыжьрэп,
Псаоу псыхъом къыхэкIыжьрэп,
КъырефэкIышъ релъэшъохы,
Бэ пэмылъэу ыпсэ хехы.
Ытыгъугъи, хилъэшъуагъи,
Хы шIуцIэшхом зэкIэ ехьы,
ШIухьафтынэу, шIушIэу фехьы.
Арышъ,  щтагъо,  а псыхъошхор,
А блэгъошхоу, а кIочIэшхор.
Къыошэт  ар  уемыкIуалI,
УзэрекIоу ар уипIалъ.

Къэтэбгынэшъ мэз джэдэшхор,
Къэгъагъ плъыжьыр изэу итэу,
Тэ тыкъехьэ  шъоф дэхэшхом.
Ины, шъуамбгъо, ар шъофышху.
ТэдкIи плъыжьы нэр пIэпехы,
Мэ IэшIуер ащ къыпехы.
Жэм къыхьыщтэп идэхагъэ,
Пфэплъышъущтэп  иинагъэ.
«СидэIуакIу», уатемыхь,
Умыгъахъэ о гонахь.
УмыпIыртIыхэу, ащ къахэкI,
Гъогум тетэу къырекIокI.
КъаIотэжьы - бэ тешIагъэу,
Мы шъофышхоу тызэрытым,
Мы чIыпIалъэу тыздэщытым,
Зэо-банэ  щыкIогъагъэу.
Пыйхэр чэфэу мыщ къихьагъэх,
Дзэ сатырэу къэуцугъэх.
Иинагъэ нэм фэплъышъурэп,
Хэты пчъагъэр къэплъытэшъурэп.
Фэдэ тIокIыкIэ анахь макIэу,
НэIум-нэIур фэгъэзагъэу,
Тидзи къакIуи къэуцугъ,
Пый мэхъаджэм пэуцугъ.
Мэкъэ гъэIухэр, шыухэр,
АгъэкIуагъэх араIонэу,
Тидзэ шъхьаIы зиугъоинышъ,
ПсынкIэ-Iофэу зиуIэшынышъ,
1эпыIэгъоу къафэкIонэу.
Уахътэ щыIэп ащ уяжэнэу,
Амал иIэп къэбгъэзэнэу.
Арышъ пыим пэуцугъэх,
Къушъхьэ мыжъохэу уцугъэх-
ТилIыхъужъхэр псэемыблэу,
Щтэр амышIэу псиблэу.
КъызхагъэкIи ябэнакIо-
Иныжъ джадэу яукIакIо,
ТибэнакIо  ащ  текIуагъ,
Ифэшъуашэ ащ ришIагъ.
ПсынкIэу къылIи къэкIожьыгъ,
ИуцупIи уцужьыгъ.
Зэплъыжьыгъэх, тIэкIу къэщтагъэх,
Сыд ашIэна, къэкIогъахэх,
Къязэонэу рагъэжьагъ,
Тидзи плъырэу ригъэжьагъ.
Пчыхьэ нэсы зэзэуагъэх,
Лъыкъэ-псыкъэ зэрэшIыгъэх.
КъызэкIакIо ащ ямыIэу,
ЗэкIэ фэхфэ, зи къэмынэу,
ТилIыхъужъхэр язэуагъэх,
ТекIоныгъэм фэбэнагъэх.
Пыим ызыплIанэ нахь къэнагъэп,
МыуIагъи  къахэнагъэп.
Ар залъэгъум кIэгъожьыгъэх,
Лъэшэу щтэхи, кIэр даупкIи кIаIэжьыгъ.
Лъэу гъэчъагъэу, чIым хэхьагъэм,
Плъыжьы къешIы джы къэгъагъхэр,
Тыгу илъынэу а зэолIхэр.
Арышъ-«СидэIуакIу»,
Къэгъагъ шъофыр гум игъэлъ,
КъэсIIотагъэр умгъэбылъ,
ТилIыхъужъмэ щытхъу афаIу,
ЦIыфы пстэумэ къафэIуат.

Уахътэр макIо, тыгъэр ехы,
Псым тыготэу тэ тыкъехы,
Хы шIуцIэшхори къэлъагъо,
ЕкIу мары ащи лъагъо.
Бэ пэмытэу ащ тыкъэсы,
Ыгъунапкъэ уашъом нэсы.
ЧIыгу лагъэм псыр изыбзэу,
Пшэхъо шъабэм къеуцуахьы,
Тыгъэ шIэтым хыр пэлыдэу,
Къегъэнэфы зэрэпсаоу.
Тызнэсыгъэр тIэкIу тешIагъэу,
Тыгъэ цыпэр псым нэсыгъэу,
Инэфынэ    егъэкIуасэ,
ШIункIыр шъэфэу къыIокIуашъэ.
Темыжагъэу жьыбгъэр къелъы,
Хыр губжыгъэу ащ къыпелъы,
Тхъурбэ орхэр  ащ къытфефы,
ЗэкIэужэу нэпкъым къефы.
ГумэкIыгъо зи щыIахэп,
Уагъэпэнэу ахэр щытхэп,
Нэпкъыр лъагэшъ къэуцIут,
КъымыгъакIоу пэуцут…

ЗекIо непэ тыкIогъагъ,
Ч1ыгу гъунэм тыщыIагъ.
Орырэ-сэрырэ «СидэIуакIу»,
Бэ тэ непэ къэтлъэгъугъэр,
ЗэдгъшIагъэр, къэткIуахьыгъэр.
ГъэшIэгъоны мы дунаир,
Джэнэт папкIэу баир.
Дэгъу ущыпсэоу утетынкIэ,
ЩыIэныгъэр щыбгъэкIонкIэ.
«СидэIуакIу», къэгъэгъун ар!
Ар гъэдахэ,  гъэкIэракIэ,
Мамырныгъэр  къэухъум!
Бэ темышIэу тыкъэсыжьы,
Мары чылэр, мары къалэр,
КIожь - о нахь пшIэн уадэжь,
Сэ, сигъогу сытехьажьы.
Усэбгынэ, сэ сикъош,
ХъяркIэ сэIо! Узэпэш!