Пакудавай лезги вахаризни стхайриз...

Атанвай зун и мукьвара мугьмандиз,
Куь меркездиз са дустунин хазандиз.
Гьуьрмет ава и шегьерда ватандиз,
Гьак1ни зун хьиз патай атай инсандиз.

Кьуд пад къацу, вилик ц1ару цуьквер тир,
Амач абур цун тавунвай са жигъир.
Атирдин ни ракъурнай заз  марварди,
Чиниз серин гузвай гуьлуьн шагьварди.

Рагъ экъеч1на нур гудайла цаварал,
Рекье гьатна  Ичер шегьерд варарал.
Килигна зун лезги тарихд чкайриз,
Баркалла хьуй абур хвейи рухвайриз.

И шегьерда гьар камуна тарих я,
Адаз талукь авайди тек тариф я.
Са берейра  зун жув-жувахъ рахазвай:
«Вуч бахтавар я вун тарих аквазвай!» 

Вил акьунмаз  иер куьчейра шегьре,
Аваздин ван къугъваз хьанай  зи къене.
Налугьуда зун къекъвезвай гьар куьче
Музыкадив ац1ай вични тир сегьне.
 
Таж гъилевай рушан къвалаг  катайла;
- Зун чуьнуьхра на ракъинкай, - лагьайла,
Заз ак1 хьанай ам зи мукьув атай хьиз,
- Ша фад, акъваз вун зи патав, - лагьай хьиз

Нянихъ мани лагьанай заз фонтанри,
Булварда яб абруз гузвай инсанри.
Яваш-яваш акъатайла чун гьуьлел
Чайкайри заз салам гана цин винел.

Килигайла Каспи гьуьлуьн лепейриз,
Ухшар авай куьре патан тепейриз,
Хтанай зи рик1ел лезги шаирар;
Даллахвидин Эгейдикай шиирар.
 
Зун Пакуда хьайи и кьве  юкъузни,
Шегьерда чахъ галаз хьанай кьве дустни.
Абрукай сад  тир  аламви - Стха Абир,
Билал муаллим кьвед лагьайди – чи шаир.

Инлай кьулухъ заз зи уьмуьр амай кьван,
Гъуцаривай абруз сагъвал т1алабда.
Гьар сеферда зун Пакудиз атай кьван
Зи фикирар шиирда тваз алахъда.

Пакувияр:  вахар стхаярни лезги!
Саламат хьуй авай чкайра куьн вири.
Гьар лезгидиз патав гурай къул чими,
Мадни хьурай куь гьар садан к1вал къени