Зун элкъведай вал
Зун элкъведай гьикI ви кьилел,
Лекь Шагьдал элкъведай хьиз.
Тек вун кIандай заз и чилел,
Са масади герек тийиз…
Ви вилера вил акьурла,
Жедай дуьня гайиди хьиз.
Экуь къамат, чин такурла,
Рагъ алай югъ къайиди хьиз.
За гекъигдай вун гъетерив-
Ви экв амма багьа тир заз,
Гагьни дагъдин шад къветерив,-
Кандай хьи ви наздив къугъваз.
Вун идеал тир зи рикIе,
Гьикьван чIав яз туькIуьрнавай;
Зи уьмуьрдин мичIи рекье,
Са чирагъ хьиз, кIуькIурнавай.
Геж ятIани гун са суал:
Бес вуна им кьатIаначни?
Ашкъидикай рикIиз хиял
Гьич садрани атаначни?
© Copyright: Билал Адилов, 2013
Свидетельство о публикации №113072700339
Свидетельство о публикации №113072700339
Рецензии