Салам гана вуна яргъи авур гъил,
Гуьзетначир, икьван чимиз къведа заз.
Акурла вун юзана хьи кIвачик чил,
Чанда гьатна кIанивилин са аваз.
Са рикIи зун негьна акъваз тавуна:
«Яш а яш туш, килигмир на а патаз!»
Са рикIини авурди заз авуна,
Жегьилвилин чIавара хьиз, кьил гатаз.
Амукьна икI - цIунни вацIун арада,
Легьзейрикай зун паталди мах хьана,-
Саки сада тунавай хьиз кьарада,
АлкIанамай, гьа чкадал къах хьана…
Югъ-къандивай гуз байихриз къилавар,
И савдади дерт гъайитIа, вучда за?
Гъулгъула тир руьгьда гьатиз гилавар
ЦIверекIдикай цIай хьайитIа, вучда за?
Вучда?
© Copyright: Билал Адилов, 2013
Свидетельство о публикации №113071806151
Свидетельство о публикации №113071806151
Рецензии