Гьикьван чIав я кьил какахьна,
РикIе гъам я, руьгьда гарар,
Амач ахвар, кьарай квахьна…
Мад къвезамач валай чарар.
Гьич алакьнач, вучиз яраб,
Са зенг кьванни авунач за?
Чуькьуьмир зун, авач жаваб…
Ихтияр я, це заз жаза.
Им ашкъи я, им туш къугъун!
Тух жедани зун гьич вавай,
Ингье, гара ава къе зун,
Мехъерихъ къвез вунни авай…
ЖедатIа гуз давам чавай?
Къалабулух гала рикIик:
КьабулдатIа яраб на гьикI?-
Лугьуз за зун юзурзава,
Ви расалдиз гьазурзава.
Эхь, зиди я вири тахсир,
Амукьрай им хьана са сир.
Рахадач зун вав агатна,
Негьиз тахьуй хъел акатна…
Минет хьурай, амма на заз
Кеж килигмир тегьне галаз…
Гьич тахьайтIа, гъамар цIуриз,
Хъсан чка гъиликин за,
Тух жедалди, рикI ацIуриз,
Ацукьна ваз килигин за…
2012г.
Ацукьна ваз килигин за...
© Copyright: Билал Адилов, 2013
Свидетельство о публикации №113071301027
Свидетельство о публикации №113071301027
Рецензии