Вун авач… жедани зи пIузаррихъ хъвер,
Эхна за кьве юкъуз, эхна са тегьер…
Гьалдай фенвай чIурар, шуьткьена цуьквер,
Мад хъфиз кIанзамач заз сув галайнихъ.
Кьурс алай векьерал хъипи яйлахрин,
Дад кумач ятарихъ кIани булахрин,
Дувулар ктIизва ингье даяхрин,
Мад хъфиз кIанзамач заз сув галайнихъ.
Гьижранди цIурзавай кукIушра живер,
Шехьзавай чун патал - ясдавай хивер,
Агьдикай жедатIа дерейра цифер?
Мад хъфиз кIанзамач заз сув галайнихъ.
Пелеш тир вуч яман лекьер цавара,
Биришар гьатнавай дагъдин къатара,
Амач, амач гила, вун а патара,-
Мад хъфиз кIанзамач заз сув галайнихъ…
Мад хъфиз кIанзамач...
© Copyright: Билал Адилов, 2013
Свидетельство о публикации №113071205781
Свидетельство о публикации №113071205781
Рецензии